Organizata Botërore e Shëndetësisë do të mbledhë një takim të anëtarëve për të diskutuar strategjitë për të luftuar një virus të ri, më ngjitës, që është shfaqur në Mbretërinë e Bashkuar, tha të martën Drejtori i OBSH-së për Evropën Hans Kluge, por nuk përcaktoi një datë për takimin.
“Kufizimi i udhëtimit për të luftuar përhapjen e virusit është i mençur derisa të kemi më shumë informacion. Zinxhirët bazë të furnizimit dhe udhëtimet thelbësore duhet të mbeten të mundshme”, shkroi ai në Twitter, duke kërkuar masa të intensifikuara parandaluese.
Organi me bazë në Gjenevë njoftoi të hënën se një lloj i ri i virusit corona i zbuluar në Mbretërinë e Bashkuar, i cili është treguar se përhapet më shpejt se varianti i mëparshëm, “nuk është jashtë kontrollit”.
Maria Van Kerkhove, kreu teknik i OBSH-së për COVID-19, tha se lloji i ri i koronavirusit, edhe pse më ngjitës, nuk shkakton forma më të rënda të sëmundjes ose më shumë vdekje, duke cituar analiza britanike.
OBSH gjithashtu njoftoi se së shpejti pret më shumë detaje mbi ndikimin e mundshëm të një lloji të ri shumë ngjitës të koronavirusit, ndërsa një numër vendesh kanë mbyllur kufijtë për të udhëtuar nga MB, nga frika e përhapjes së tij.
Një lloj i ri që ka alarmuar Mbretërinë e Bashkuar është zbuluar gjithashtu në individë në Australi, Islandë, Itali dhe Hollandë, dhe ka pasur disa raste në Danimarkë.
OBSH theksoi se kjo është një fazë normale në evolucionin e pandemisë.
Në një deklaratë të lëshuar të martën, OBSH përsëriti se nuk kishte ende informacion të mjaftueshëm për të përcaktuar nëse lloji i ri mund të ndikojë në efektivitetin e vaksinave dhe se provat po vazhdonin. /tesheshi.com/
