Bashkangjitur fiksimit se më 28 Nëntor, pra Ditën e Flamurit, qeveria e Kosovës do shpallë themelimin e ushtrisë, Beogradi po ushqen dhe paranojën se atë ditë do sulmohen serbët e Kosovës.
Kjo u shfaq gjatë një interviste të Tanjug-ut me komandantin e sapoemëruar të Bondsteel-it, Roy Macaraeg
Ai u përgjigj në pyetjen se si do të jetë reagimi i KFOR-it nën komandën e tij, në rast të shpërthimit të dhunës kundër serbëve pas shpalljes mundshëm të ushtrisë së Kosovës në Ditën e flamurit shqiptar.
“Në lidhje me votimin mbi transformimin e Forcës së Sigurisë së Kosovës (FSK) më 28 Nëntor, ai është një proces politik. Por ju e dini, nëse kjo ndodh, ne sigurisht do të jemi në gjendje për të reaguar. Pozicioni aktual i KFOR-it është se ka një mandat i cili është në fuqi”, tha Macaraeg.
I pyetur nëse ai kishte marrë udhëzime specifike nga selia e NATO-s për atë çfarë pritet të ndodhë më 28 nëntor, Macaraeg u përgjigj.
“Një përgjigje e shkurtër: Jo”, tha ai.
I pyetur se si do të menaxhojë Bondsteel misionin e ruajtjes së paqes, krejtësisht të ndryshëm në lidhje me funksionin e Gardës Kombëtare të Ushtrisë Amerikane, ku ai ishte inspektori i ngarkuar me një buxhet prej 16 miliardë dollarë, Macaraeg tha se ai ka “përvojë të larmishme.” /tesheshi.com/
