Kreu i Kishës Orthodokse serbe, Patriarku Irinej tha se Shqipëria, së bashku me shqiptarët e Kosovës, dëshiron të zgjerohet në Serbi dhe të pushtojë vendin më të lavdishëm serb – Kosovën, e cila, siç tha ai kurrë nuk ishte një koloni, por një vend i lindur serb.
“Shqipëria dhe shqiptarët në Kosovë, sot bëjnë atë që as një sens i përbashkët nuk mund ta pranojë. Për fat të keq, Evropa i sheh të gjitha dhe është e çuditshme dhe keqardhëse që as ajo e askush nuk bën asgjë”, tha Irinej në një intervistë televizive.
Ai thekson se sot, për njëfarë interesi, Shqipëria është bërë e preferuar nga shumë vende, si Amerika ashtu dhe pjesa më e madhe e Evropës.
“Është shumë e rëndësishme të dimë pse po ndodh kjo, cilat janë arsyet dhe cilat janë interesat e tyre. Sigurisht që ata kanë disa interesa ose kanë qenë të korruptuar disi nga shqiptarët dhe ne e dimë se si është sot – ata kanë fituar besimin, mbrojtjen dhe ndihmën e tyre”, tha kleriku i lartë serb.
Ai, si gjithherë, përmendi të ashtuquajturat “ngjarje të mëdha në historinë e popullit serb”, që sipas tij u zhvilluan në Kosovë dhe se Serbia, si shtet, dhe populli serb nuk mund ta japin Kosovën në asnjë rrethanë.
“Gjithçka që është pozitive dhe e vlefshme është zhvilluar aty – shteti dhe legjislacioni, arsimi dhe kultura. Ne jemi të detyruar me të gjitha forcat tona në mbrojtje të tokës sonë të shenjtë, të cilën dëshirojnë të na e marrin”, tha Patriarku Irinej.
Kështu, edhe njëherë shfaqet paranoja serbe se kur është fjala për Kosovën, e gjithë bota është drejtuar kundër tyre. /tesheshi.com/
