Policia e Korçës parandaloi një krim brenda familjes. Ngjarja ka ndodhur në fshatin Velitërnë, në Maliq, ku një 38-vjeçar rrihte në mënyrë të vazhdueshme gruan dhe dy fëmijët e tij të mitur.
Festim Kume ishte i alkoolizuar, teksa në shtëpi mbante një pushkë dhe 3 armë artizanale, të cilat mund t´i përdorte kundër familjarëve të tij. Policia është kontaktuar nga ana e bashkëshortes së 38-vjeçarit dhe ka mbërritur në shtëpinë e çiftit me dy fëmijë, ku dhe ka gjetur arsenalin e armëve.
Kume është arrestuar nga policia në kushtet e flagrancës. Policia sekuestroi gjatë kontrollit në banesë 1 pushkë model 56, 3 armë artizanale pistolete, 1 krëhër automatiku model 56 si edhe 21 copë fishekë luftarakë, të cilat ky shtetas i posedonte pa lejen e organeve kompetente.
Materialet i kaluan Prokurorisë të Rrethit Gjyqësor Korçë për veprat penale : “Dhuna në familje” dhe “Prodhimi dhe mbajtja pa leje e armëve luftarake dhe e municionit” parashikuar nga nenet 130/a/4 dhe 278 të Kodit Penal. /tesheshi.com/
