Kandidati presidencial në Shtetet e Bashkuara, Donald Trump tha se muslimanët nuk po ndihmojnë për të parandaluar sulme të tilla si ato që vranë të paktën 30 persona në Belgjikë, por kjo ka nxitur një sërë protestash si nga qeveria britanike, ashtu edhe nga grupet muslimane në vend.
Në një intervistë me rrjetin ITV të Britanisë të mërkurën, Trump u pyet se cili ishte mesazhi i tij ishte për muslimanët britanikë pas sulmeve në Bruksel dhe atyre në Paris nëntorin e vitit të kaluar.
“Kur ata vërejnë telashe, e kanë për detyrë t’i raportojnë, por ata nuk po raportojnë, ata absolutisht nuk po raportojnë dhe ky është një problem i madh”, tha Trump.
Komentet e tij u ballafaquan menjëherë me deklaratën e ministres së Brendshme britanike, Theresa May e cila tha se ai ishte “qartësisht gabim” nëse sugjeron se muslimanët në Britani nuk po arrinin të raportonin aktivitete të dyshimta nga ekstremistët.
Trump, kandidati që kryeson garën mes republikanëve për nominimin në zgjedhjet presidenciale të nëntorit, ka bërë një seri deklaratash kontroverse gjatë fushatës së tij. Mbështetësit e Trump e shohin atë si dikë që flet të vërteta të parehatshme, por ai ka ndezur zemërimin e shumë të tjerëve në Shtetet e Bashkuara dhe në të gjithë botën.
Trump, i cili bëri thirrje për të ndaluar muslimanët të hyjnë në Shtetet e Bashkuara, tha se është “turp” që një nga të dyshuarit për sulmet e Parisit nëntorin e kaluar, të jetë gjetur pas një kërkimi të gjatë nga policia në një zonë të Brukselit ku ai jetonte.
“Ai ishte në lagjen e tij ku ishte rritur dhe askush nuk e raportoi dhe me gjasa kjo është rezultati që morën për këtë. Është një turp”, tha ai.
Trump tha gjithashtu se edhe një sulm nga ekstremistë muslimanë si i cilësoi, në Kaliforni dhjetorin e kaluar, ku u vranë 14 persona, mund të ishte ndaluar.
“Shumë njerëz në komunitet e dinin se ata po e planifikonin atë për shkak se në apartamentin e tyre kishin bomba përgjatë gjithë dyshemesë, dhe ata nuk i raportuan”, tha ai.
“Nuk e di se çfarë është. Është sikur ata po mbrojnë njëri-tjetrin, por në të vërtetë po bëjnë një dëm shumë të madh. Ata duhet të jenë hapen e të raportojnë të këqinjtë”.
Ministrja May e Britanisë i tha parlamentit se Trump e kishte gabim.
“Kuptoj se ai ka thënë se muslimanët nuk dalin për të raportuar shqetësimet e tyre në Britaninë e Madhe. Kjo nuk është absolutisht e vërtetë, ai e ka tërësisht gabim”, tha ajo.
Përgatiti: Juli Prifti – /tesheshi.com/
