Në Singapor, një 16-vjeçar u arrestua për planifikimin e vrasjes së muslimanëve në dy xhami në përvjetorin e sulmit terrorist në Christchurch.
Frymëzuar nga Brenton Tarrant, vrasësi nga Christchurch, adoleshenti dyshohet se planifikonte të godiste viktimat e tij dhe të transmetonte sulmin drejtpërdrejt.
Ai është personi më i ri që përfundon në burg pa gjyq, një opsion i siguruar nga Akti i Sigurisë Kombëtare të Singaporit.
Autoritetet nuk zbuluan identitetin e 16-vjeçarit, por dihet vetëm se ai është anëtar i kishës protestante. Ministria e Brendshme tha se ishte “motivuar nga një urrejtje e fortë ndaj Islamit dhe i magjepsur nga dhuna”.
Ai me sa duket u ndikua nga Tarrant, tha ministria, duke vënë në dukje faktin se ai planifikoi të kryejë sulmet e tij në 15 mars të këtij viti, në përvjetorin e dytë të sulmit në Christchurch. Ai gjithashtu pretendohet se pranoi se ishte i ngazëllyer duke parë videon e sulmit të Tarrant.
Në pamundësi për të gjetur një pushkë, zgjodhi një hanxhar
Ai planifikoi të sulmonte dy xhami të vendosura afër shtëpisë së tij. Plani përfshinte gjithashtu vjedhjen e kartës së kreditit të babait të tij për të marrë me qira një makinë. Ai nuk kishte patentë shoferi, por ishte i bindur se disi do të kishte sukses, njoftoi shërbimi i sigurisë i Singaporit.
Ai fillimisht planifikoi të përdorte një pushkë automatike, por hoqi dorë pasi kuptoi se sa e vështirë ishte për të marrë një. Zgjedhja tjetër e tij ishte një hanxhar.
Ai gjithashtu përgatiti një manifest në të cilin përshkroi urrejtjen e tij ndaj muslimanëve. Gjatë marrjes në pyetje, ai pranoi se ishte i vetëdijshëm se kishte vetëm dy mundësi: ose të arrestohej para sulmit, ose policia do ta vriste pas masakrës.
Autoritetet njoftuan se ai ishte në pritje të rehabilitimit fetar, psikologjik dhe social që do ta “ndihmonte atë të hiqte qafe ideologjinë radikale në të cilën ai u përfshi”. /tesheshi.com/
