Ish-komandanti Suprem i Forcave Aleate të NATO-s në Europë, Wesley Clark, po cilëson se rajoni i Ballkanit mund të përfshihet përsëri nga një krizë me përmasa të gjera, ndaj së cilës SHBA duhet që urgjentisht të reagojnë.
“Po, duhet të jemi të shqetësuar. Ballkani Përendimor duhet të lëvizë sa më shpejt drejt civilizimit përendimor dhe transatlantik. Janë bërë 23 vjet prej se kemi nënshkruar Marrëveshjen e Dejtonit, dhe ende na ka mbetur shumë punë në Bosnjë e Hercegovinë, mendoj se është mjaft e vështirë”, ka deklaruar Clark në një intervistë për televizionin boshnjak “N1 TV”.
Clark ka folur edhe për korrupsionin në rritje në Ballkanin Përendimor, për çka bën thirrje të luftohet.
“Kjo nënkupton që qeveritarët si dhe ata të zgjedhurit duhet të jetojnë në mënyrë modeste, të mos presin të bëhen miliarderë nga pagat e tyre”, ka pohuar Clark.
Kujtojmë se Clark gjatë vizitës së fundit në Kosovë u bëri thirrje institucioneve që prioritet të kenë zhvillimin ekonomik e jo bërjen e ushtrisë.
Clark ishte kryekomandant gjatë bombardimeve të NATO-s në Kosovë dhe Serbi, të cilat përfundimisht i dhanë fund politikës së spastrimit etnik të instaluar nga Milosheviçi. /tesheshi.com/
