Ndërsa opozita por jo vetëm e kritikoi jashtëzakonisht shumë hapjen e Ministrisë së Inovacionit dhe Ndërmarrësisë nga qeveria “Haradinaj”, ministri Besim Beqaj që drejton këtë dikaster e sheh tejet të rëndësishëm pasi thotë se do të ndihmojë jashtëzakonisht shumë zhvillimit ekonomik, veçanërisht ekonomisë digjitale.
“Është një ministri kreative e cila do të ketë një bashkëpunim të ngushtë me sektorin privat. Kemi një trend në botë që është u duke u zhvilluar me ekonomi digjitale, prandaj ka qenë shumë e nevojshme që edhe Kosova ta ketë një ministri të inovacionit dhe ndërmarrësisë”, tha ai për RTK-në.
Beqaj, ka paralajmëruar se vitin që vjen do të hapen katër qendra inovative dhe të ndërmarrësisë.
Ai tha se fillimisht do të startohet me hapjen e Qendrës Inovative dhe të Ndërmarrësisë në Prizren, pastaj do të vazhdohet në Mitrovicë, Pejë dhe Prishtinë.
Beqaj, ndërkaq, bëri të ditur se me buxhetin e planifikuar nga qeveria parashihet që ministria të cilën e drejton t’i ketë mbi 11 milionë euro.
“Të rinjtë e Kosovës duhet të jenë të gatshëm për tregun e punës dhe se synim i kësaj ministrie është që ta lidhim teorinë me praktikën”, tha Beqaj.
Ai bëri të ditur se Ministria që drejton nuk do të merret me procedurat administrative, por se do të merremi me avokimin e ideve për zhvillimin ekonomik.
Ndryshe, Programi i qeverisë 2017-2021 ka treguar edhe për objektivat e kësaj ministri se me çka do të merret.
Sipas këtij programi, synimi i qeverisë është stimulimi i aktiviteteve inovative në Kosovës të cilat do të jenë të lidhura ngushtë më ndërmarrësinë dhe me fushat e tjera të ekonomisë.
“Zhvillimi i ndërmarrësisë dhe iniciativës private përmes inovacioneve dhe me fokus në zhvillimin e NVM-ve prodhuese dhe shërbyese, është parakusht për rritje të punësimit, rritje të konkurrueshmërisë dhe rrjedhimisht rritje të sektorit privat. (veçanërisht të të rinjve dhe grave)”, thuhet në programin qeverisës për këtë ministri. /tesheshi.com/
