Nga Blendi Gashi
Mosformimi i një komisioni mjekësor që do të caktonte shkallën e invaliditetit për ata që ende nuk po i gëzojnë pensionet, dhe paralajmërimet se Qeveria e Kosovës mund të zvogëlojë pensionet e veteranëve, ka bërë që ish-ushtarët e Ushtrisë Çlirimtare të Kosovës të protestojnë edhe sot para objektit të qeverisë së Kosovës.
Kryetari për mbrojtjen e të drejtave të veteranëve të UÇK-së, Xhevdet Qeriqi, ka thënë për tesheshi.com se ata fuqishëm do të kundërshtojnë idenë e zvogëlimit të pensioneve.
Ai ka deklaruar se nëse nuk merren parasysh kërkesat e tyre, atëherë ata do të ndërmarrin masa të dhunshme.
“Ne nuk pranojmë në asnjë formë zvogëlimin e pensioneve për veteranët dhe invalidët e luftës së Ushtrisë Çlirimtare të Kosovës.
Nëse Qeveria vendos që pesnionet të zvogëlohen, veteranët do ta kundërshtojnë fuqishëm një vendim të tillë. Ne edhe ashtu nuk jemi të kënaqur me shumën aktuale të caktuar nga shteti e lërë më që ato të zvogëlohet”, ka thënë Qeriqi, për tesheshi.com.
Qeriqi, më tej thotë se kërkesë tjetër e veteranëve është të formohet një komision mjekësor i cili do të merret me një pjesë të invalidëve të luftës të cilët ende nuk po i gëzojnë pensionet, për shkak të mungesës së një udhëzimi administrativ.
“Janë diku 3000 veteranë që janë të papunë dhe në gjendje të vështirë, por që shkaku i një udhëzimi administrativë nuk po arrijnë t’i gëzojnë të drejtat. Ia kemi bërë edhe propozimet Ministrisë së Punës që kostoja të jetë edhe më e lirë. Kërkojmë që të nxjerret një udhëzim administrativë nga ana e qeverisë dhe t’i hapet rruga formimit të komisionit mjekësorë.”, thekson Qeriqi.
Pushteti u jep premtimeve veteranëve
Protesta e mbajtur sot nga veteranët ka zgjuar nga gjumi drejtuesit e institucioneve të vendit, konrektisht Ministrinë e Punës dhe Mirëqenies Sociale të cilët sot takuan përfaqësuesit e veteranëve dhe arritën një ujdi të përkohëshme, pasi me javë të tëra nuk pranonin t’i takonin.
Ministri i Punës, Arban Abrashi, ka thënë se ende nuk kanë ndonjë vendim për zvogëlimin e pensionit për veteranët edhe pse FMN ka pasur një shqetësim. Ai tha se i vjen keq që ka ardhur deri tek kjo formë e takimit, pasi sipas tij, veteranët e kanë derën e hapur në ministrinë e tij për të treguar shqetësimet e tyre.
Abrashi shtoi se po pritet përfundimi i listave të veteranëve dhe invalidëve dhe pastaj do të hapet procesi i aplikimit për veteranë invalidor.
Ministri Abrashi u ka premtuar veteranëve të UÇK-së se gjatë kësaj jave, eventualisht javën e ardhshme do të ecin me procedurat për krijimin e komisionit për invalidët, pasi, siç ka thënë ai, gjatë javës së ardhshme do të dalin listat përfundimtare.
Kurse, Xhevdet Qeriqi ka thënë pas takimit me ministrin Abrashi se ka kërkuar nga ai sa më shpejtë të nxirret një udhëzim administrativ i cili i hap rrugë komisionit mjekësorë për përcaktimin e shkallës së invaliditetit për këto kategori.
Ai gjithashtu tha se kanë diskutuar dhe rreth fryrjes së listave duke kërkuar nga ministri dhe qeveria të behët një auditim i pavarur dhe të pastrohen listat nga njerëzit që padrejtës isht po i gëzojnë pensionet.
Organizatat e luftës janë të vetëdijshme se numri i veteranëve është i fryrë, por sipas tyre, me këtë çështje duhet të merret shteti.
Problemi ka lindur pasi 21 mijë veteranë kërkojnë pensionin në vlerën e 170 eurove, e që për 1 vit qeveria duhet të ketë saktësisht 42 milionë e 840 mijë euro.
/tesheshi.com/
