Kryeministri i Kosovës, Albin Kurti, ka akuzuar Serbinë se po kërcënon të provokojë një luftë të tretë ballkanike dhe se po sillet si Gjermania mes dy luftërave botërore.
Në një intervistë për Daily Telegraph, ai paralajmëron se krizat e fundit në Kosovë dhe Bosnjë mund të përshkallëzohen nëse qeveritë perëndimore nuk e marrin seriozisht.
“Mendoj se situata është padyshim më e rrezikshme se më parë, ata duan të veprojnë si Gjermania mes dy luftërave botërore – nëse nuk na kënaqni, ne do të provokojmë një tjetër. Sepse ata bënë një raund [të luftërave] në vitet 1990”, tha Kurti.
Ai tha se shifrat që Serbia shpenzon për buxhetin ushtarak janë rritur me shpejtësi vitet e fundit dhe pyeti se “kur po i blejnë të gjitha këto?”
Daily Telegraph thekson se buxheti i mbrojtjes i Serbisë është rritur me gati 70 për qind që nga viti 2015, në një miliardë e gjysmë dollarë në vit, duke e bërë atë “shpenzuesin” më të madh ushtarak në Ballkanin Perëndimor.
Sipas gazetës, Serbia ka modernizuar kryesisht aviacionin e saj dhe ka blerë drone, avionë dhe sisteme të mbrojtjes ajrore nga Rusia dhe Kina. /tesheshi.com/
