Muzafer Korkuti u zgjodh dy ditë më parë në postin e zv.kryetarit të Akademisë së Shkencave, duke i lënë vendin e kryetarit Gudar Beqirajt.
I gjithë proçesi zgjedhor i një institucioni që mbart një emër të rëndë u konsiderua një farsë, sikundër ka ndodhur me vite me rradhë, ku kryetarët dhe nënkryetarët i lënë stafetën njëri-tjetrit sa herë ka zgjedhje.
Pas zgjedhjeve, kryeministri Edi Rama reagoi ashpër në rrjetet sociale, duke paralajmëruar se fondet publike për Akademinë e Shkencave do ti kalonin kërkimit shkencor pranë universiteteve. Rama e quajti farsë zgjedhjen,ndërsa më parë kishte kërkuar reformimin e institucionet.
Nga kjo deklaratë e Ramës kanë kaluar 48 orë, por duket se ajo ka pasur një efekt. Zv.kryetari i zgjedhur me 27 vota pro dhe 3 kundër, Muzafer Korkuti raportohet se është dorëhequr.
Pas kësaj, njoftohet se Asamblea e Akademisë së Shkencave do të zhvillojë më 11 shtator një mbledhje të jashtëzakonshme ku do të diskutojë mbi reformimin.
Nuk dihet nëse edhe kryetari i ri i ASH, Gudar Beqiraj do të veprojë njëlloj si zv.kryetari duke paraqitur dorëheqjen.
Nëse kjo ndodh atëherë do të mbahen mend si drejtuesit e Akademisë së Shkencave që qëndruan në detyrë vetëm pak orë ose disa ditë.
Por nëse nuk ndodh mund të hyjnë po në historinë e ASH, si drejtuesit që iu hoqën fondet publike nga qeveria. /tesheshi.com/
