Konflikti në Ukrainë është në prag të përshkallëzimeve të mëdha. Ky fakt u bë i ditur nga nënkryetari i misionit monitorues të Organizatës për Siguri dhe Bashkëpunim Evropian (OSBE), që mbikëqyr armëpushimin në Lindje të Ukrainës, Alexander Hug.
Ai ka deklaruar se tre javët e fundit kanë qenë më të dhunshmet që kanë regjistruar ndonjëherë, jo vetëm në përdorim të armatimit të lehtë, por edhe të armatimit të rëndë. Hug kërkon që armët e rënda të tërhiqen në përputhje me Marrëveshjen e Minskut 2015, nga zonat e populluara me civilë.
“Ne shohim armë në zonat ku nuk duhet të jenë, por ne nuk mund t’i identifikojmë ato nga larg, sepse nuk kemi qasje të drejtpërdrejtë në to. Shpesh ato vetëm i dëgjojnë, por nuk i shohim. Fakti është se të dyja palët nuk e kanë bërë atë që kanë premtuar ta bëjnë”, tha Hug. Ai thotë se jeta e banorëve është në rrezik si nga sulmet, ashtu edhe nga mungesa e ushqimeve, energjisë elektrike, gazit dhe shërbimeve tjera që janë të domosdoshme për jetën e përditshme, e që bëhet edhe më e vështirë tanime gjatë sezonit të dimrit./tesheshi.com/
