Lemzlem Türeci, një shkencëtare që themeloi BioNTech dhe që krijoi vaksinën e Pfizer-it, thotë se ne mund të kemi vaksina efektive të kancerit në vitet e ardhshme.
Zhvillimi i një vaksine parandaluese të kancerit ishte në të vërtetë qëllimi i saj origjinal për BioNTech, tha ajo për Associated Press. Por tani, pas suksesit mahnitës të ndërmarrjes dhe hyrjes së parave nga vaksina COVID, ajo thotë se ky më në fund është një projekt i vlefshëm që duhet të vazhdohet dhe të realizohet.
Ashtu si një vaksinë e koronavirusit, BioNTech punon në vaksinat e kancerit që përdorin mARN për të “mësuar” sistemin imunitar të një personi se si të pikasë, shënjestrojë dhe vrasë tumoret kanceroze, shkruan AP.
“Ne kemi disa vaksina të ndryshme të kancerit bazuar në mARN,” tha Türeci.
Sidoqoftë, ajo nuk është e sigurt kur një vaksinë e tillë mund të jetë gati, dhe sidomos kur do të ishte në dispozicion për përdorim.
“Eshtë shumë e vështirë të parashikosh në zhvillimin inovativ,” i tha ajo AP. “Por ne presim që të kemi vaksinat tona të kancerit brenda disa viteve.”
Por kjo nuk është për t’u habitur – rruga nga zhvillimi te testimi, vërtetimi dhe shpërndarja e një vaksine të re është e gjatë dhe e mundimshme. Por Türeci sugjeroi që BioNTech është i pajisur mirë për të trajtuar misionin pas një procesi të përshpejtuar në mënyrë drastike të punës me Pfizer-in për vaksinën COVID-19.
“Vlen të marrësh vendime të guximshme dhe të besosh se nëse ke një ekip të jashtëzakonshëm, do të jesh në gjendje të zgjidhësh çdo problem dhe pengesë që të del përpara në kohë reale,” përfundoi ajo. /tesheshi.com/
