Kamionët e parë me ndihma hynë në Gaza dje pas gati tre muajsh bllokadë izraelite të ushqimit, ilaçeve dhe furnizimeve të tjera, thanë Izraeli dhe Kombet e Bashkuara (OKB). Pesë kamionë me ushqim për fëmijë dhe ndihma të tjera shumë të nevojshme hynë në territorin ku jetojnë më shumë se dy milionë palestinezë.
Por duket se kjo nuk është aspak e mjaftueshme, raporton Guardian.
Shefi i ndihmës humanitare të OKB-së, Tom Fletcher, e quajti një “zhvillim të mirëpritur“, por i përshkroi kamionët si “një pikë uji në ujë në oqean të asaj që nevojitet urgjentisht”. Ekspertët paralajmëruan për zi buke në Gaza javën e kaluar, dhe Fletcher foli sot për foshnjat që janë në rrezik sepse po mbërrin shumë pak ushqim.
Fletcher i tha programit Today të BBC Radio 4 se kamionët me ndihma që përmbajnë ushqim për foshnje dhe lëndë ushqyese teknikisht janë në Gaza, por ende nuk kanë arritur te civilët sepse janë në anën tjetër të kufirit.
Ai shtoi se 14,000 foshnje mund të vdesin brenda 48 orësh nëse ndihma nuk arrin tek ato në kohë. “Do doja të shpëtoj sa më shumë nga këto 14,000 foshnje të jetë e mundur në 48 orët e ardhshme”, i tha ai BBC-së.
Kur u pyet se si OKB-ja arriti në këtë shifër, ai u përgjigj se ata kanë ekipe të forta në terren. “Sigurisht, shumë prej tyre janë vrarë, por ende kemi shumë njerëz në terren. Ata janë në qendra mjekësore, në shkolla, duke u përpjekur të vlerësojnë nevojat”, përfundoi ai. /tesheshi.com/
