Një numër i veteranëve të luftës të Ushtrisë Çlirimtare të Kosovës protestuan sot para Qeverisë kundër zvarritjes së publikimit të listave të veteranëve të UÇK-së dhe kundër themelimit të Gjykatës Speciale.
Protesta e veteranëve eskaloi për një moment pasi protestuesit thyen kordonin e policisë dhe hynë me dhunë në oborrin e qeverisë. Synimi i protestuesve ishte hyrja në objektin qeveritar, por kjo gjë u pengua nga policia që ruante objektin qeveritar.
Pas kërkesave të veteranëve, Komisioni Qeveritar për njohjen dhe verifikimin e statusit të veteranëve, invalidëve, i pranoi në takim një numër të veteranëve protestues.
Një javë afat për Qeverinë
Pas më shumë se një orë bisedimesh, pas takimit me Komisioni Qeveritar, kryetari i Këshillit për Mbrojtjen e të Drejtave të Luftëtareve të UÇK-së, Xhevdet Qeriqi ka thënë se ata kanë marrë premtim që deri në fund të javës së ardhshme do të publikohen listat. Qeriqi ka thënë se anëtarët e komisionit u kanë thënë atyre se nëse listat nuk publikohen deri atëherë edhe anëtarët e komisionit do t’i bashkohen protestës. Premtimi i anëtarëve të komisionit nuk është pritur mirë nga një pjesë e protestueseve të cilët kanë thënë se nuk besojnë më në këtë institucion.
Qeveria e Kosovës konkretisht Komisioni Qeveritar për njohjen dhe verifikimin e statusit të veteranëve, invalidëvetë Ushtrisë Çlirimtare të Kosovës ka afat deri javën e ardshme të publikoi listat në të kundërtën veteranët nuk do t’i ndalin protestat deri në realizimin e kërkesave të tyre.
Organizatorët e protestës kanë ritheksuar se nëse listat nuk publikohen me kohë protesta do të vazhdojnë dhe do të jenë edhe më të dhunshme.
Kërkesa kryesore e veteranëve të luftës së UÇK-së është që të publikohen por edhe pastrohen listat e përfituesve të statusit të veteranit të luftës.
“Në lista ka emra që kurrë s’kanë qenë në luftë”
Veteranët protestues u shprehën të mllefosur se në listat e publikuara deri më tani ka pasur shumë parregullësi.
“I kanë shti me pare njerëz të caktuar në listat e veteranëve. Nuk do ta ndalemi derisa të publikohen listat, por edhe të pastrohen ato”. “Në lista ka emra që kurrë s’kanë qenë në luftë, derisa jashtë kanë mbetur njerëz që në kohën më të vështirë luftuan për atdheun e tyre, për një të ardhme më të mirë, por që nga përfundimi i luftës jetojnë në kushte të mjerueshme”, deklauan disa nga veteranët protestues që shprehën zhgënjimin në klasën politike.
Një plumb në oborrin e qeverisë
Thyerja e kordonit të policisë, hyrja me dhunë në objekin e qeverisë, tentimi për të hyrë në objektin qeveritar, thirrjet “UÇK, UÇK”, “Me hajna nuk ka shtet”, ishin disa nga ngjarjet kryesore që e përshkruan protestën e mabjtur sot nga veteranët e UÇK-së. Por, jo vetëm këto.
Një plumb i rënë (hedhur) në tokë, qoftë me apo paqëllim është treguesi më i mire se protesta e veteranëve e zhvilluar sot para qeverisë shumë lehtë ka mundur të ishte shumë më e dhunshme, gjë që mund të ndodh nëse nuk plotësohen kërkesat e veteranëve.
Deputeti Daut Haradinaj kërcënon Komisionin për verifikim
Deputeti i AAK-së, Daut Haradinaj, ka paralajmëruar Komisionin për verifikimin e veteranëve të luftës së UÇK-së, se do t’i zvarrisin në shesh për mos-nxjerrjen e listave përfundimtare.
Ish komandanti i UÇK-së ka thënë se nuk do t’i nënshkruajë këto lista, pasi që jashtë tyre kanë mbetur një numër i madh i bashkëluftëtarëve të tij. “Anëtarët e komisionit për verifikimin e ish ushtarëve të UÇK-së, veteranët që do të jenë edhe më shumë, do t’i zvarrisin në shesh. Unë nuk do t’i nënshkruaj këto lista pa u fut krejt ushtarët e mi. Të gjithë veteranët e luftës kanë pasur kartela”,ka thënë Haradinaj në emisionin “Info Magazinë” në Klan Kosova. Haradinaj ka thënë se “Rrafshi i Dukagjinit ka pasur më tepër ushtarë se Zona e Drenicës dhe se këtë e dinë edhe Sami Lushtaku dhe gjithë komandantët e UÇK-së. Ndërsa po del se Dukagjini ka më pak ushtarë se disa zona të tjera”.
KMDLNJ, listat e publikuara të veteranëve të fryera dhe jo reale
Këshilli për Mbrojtjen e të Drejtave dhe Lirive të Njeriut që ka vëzhguar protestën e veteranëve të Ushtrisë Çlirimtare të Kosovës vlerëson se në protestë ishin rreth 300 protestues. “ Në oborrin e Qeverisë dhe rreth saj ishin vensdosur një numër i konsiderueshëm i pjesëtarëve të njësisë speciale të Policisë së Kosovës dhe poashtu policë të rregulltë. Protesta filloi dhe deri në fund ka qenë e qetë përjashtuar rastin kur u thyen dyert e hyrjes në oborrin qeveritar”.
KMDLNJ përkrah protestat e qeta si njërën prej të drejtave elementare të njeriut . KMDLNj ka deklaruar listat e publikuar janë të fryra, joreale duke kërkuar përmirësimin e tyre dhe duke kërkuar përgjegjësi për ata që kanë kontribuar që këto lista të nxisin pakënaqësi të arsyeshme siç protestat e sotit e veteranëve të UÇK-së.
Veterani nga Malisheva: Edhe fëmijët tanë do të na mallkojnë për përfitimet e pamerituara!
Sinan Kastrati, nga fshati Balincë i Malishevës, vlerëson se listat e kategorive të dala nga Lufta e UÇK-së – me theks të veçantë ajo e Skuadrës së Ushtarëve të Balincës ku sipas hierarkisë ku thotë se ai ka qenë komandant, nuk janë ato që duhet të jenë. “Në Listën e Veteranëve mungojnë disa Veteranë dhe janë disa përsona që kurrë në asnjë moment nuk njihën si ushtarë as nga ushtarët e as nga popullata. Ndryshime pres të ketë në të gjitha kategoritë”, ka deklaruar ditë më parë veterani malishevas.
Ndryshe, ende nuk janë publikuar listat nga Zona e Drenicës, ajo e Dukagjinit dhe Shtabit të Përgjithshëm të UÇK-së.
Ndërsa, janë publikuar listat nga zona operative e Karadakut, Nerodimit, Llapit, Shalës e Pashtrikut, por ka pasur një varg vërejtjesh për parregullsitë e shumta në lista. /tesheshi.com/
