Orët e para të së shtunës kanë sjellë nisjen e sulmeve mbi objektivat ushtarakë sirianë, si një reagim i paralajmëruar për përdorimin e armëve kimike nga regjimi i Esadit javën e shkuar në Duma.
Sulmi është kryer nga Shtetet e Bashkuara të Amerikës, Britania dhe Franca, ndërsa shpërthimet janë dëgjuar në Damask, Homs, e gjetkë.
“SHBA-ja, Franca dhe Britania nisën sulmet ushtarake në Siri për të ndëshkuar Beshar Esadin për një sulm të dyshuar kimik kundër civilëve dhe për ta frenuar atë që ta përsërisë këtë, deklaroi të premten presidenti Donald Trump,” raporton agjencia e lajmeve “Associated Press”.
Sipas së njëjtës agjenci lajmesh, televizioni sirian ka bërë me dije se mbrojtja ajrore e Sirisë u është përgjigjur sulmeve me raketa Tomahawk.
Al Jazeera gjithashtu i referohet televizonit shtetëror sirian që pretendon për rrëzimin e disa raketave gjatë kundërpërgjigjes.
SANA, agjencia shtetërore siriane e lajmeve, e cilësoi sulmin e udhëhequr nga amerikanët një shkelje të ligjit ndërkombëtar, duke shtuar se sulmi kishte vënë në shenjë depo armatimesh në zonën e Homsit.
Tre civilë raportohen të jenë plagosur në Homs, sipas njoftimeve paraprake, që ende janë të turbullta. Sekretari amerikan i Mbrojtjes, James Mattis, tha për gazetarët se nuk kishte të dhëna për humbje amerikane në operacionin e këtij mëngjesi.
Vala e sulmeve të kufizuara ka përfunduar për momentin, por nuk dihet nëse do të ketë goditje të tjera në orët në vazhdim të objektivave siriane.
Sulmet përkeqësojnë marrëdhëniet mes SHBA-së dhe Rusisë, aleatit kryesor të Sirisë. Ambasadori rus në SHBA u shpreh se sulmi do të ketë pasoja, përgjegjësia për të cilat është e Uashingtonit, Londrës dhe Parisit. /tesheshi.com/
