Presidenti Thaçi tha se përmbyllja e dialogut politik me Serbinë me marrëveshje ligjërisht obligative, që nënkupton njohje reciproke, është interes nacional i Kosovës – raporton REL
Duke folur në konferencën “Zëri i Popullit rreth ‘Finales së Madhe’ ndërmjet Kosovës dhe Serbisë”, ai deklaroi: “Nuk kam kurrfarë dyshimi që marrëveshja mund të arrihet këtë vit, marrëveshje ligjërisht obligative mes Kosovës dhe Serbisë, por nëse nuk ndodh, do të hyjmë në një fazë të rrezikshme të këtyre raporteve, e cila edhe mund të destabilizojë jo vetëm raportet tona si dy shtete, por edhe rajonin”, është shprehur ai.
Sipas Thaçit, situata, kështu siç po vazhdon ,nuk është aspak e mirë
“Fatkeqësisht situata dhe zhvillimet e fundit nuk janë aspak premtuese. Gjërat nuk po lëvizin fare dhe aktualisht jemi duke vendnumëruar, përkundër iniciativave të fundit për të zhbllokuar dialogun, rezultati është zero. Mungesa e dialogut dhe perspektivës për arritjen e një marrëveshjeje për normalizimin e raporteve mes Kosovës dhe Serbisë, është rreziku më i madh i mundshëm për sigurinë e stabilitetin për të dy vendet dhe rajonin”, ka theksuar kreu i shtetit të Kosovës.
Ai mbrojti dhe tezën e korrigjimit të kufijve, duke thënë se “është për keqardhje që klasa politike kosovare po dështon që të bashkohet për bërë realitet idealin e bashkatdhetarëve tonë të Luginës së Preshevës Medvegjës dhe Bujanocit që t’i bashkëngjiten Kosovës”. /tesheshi.com/
