Gjendja e brishtë e bankave italiane në klimën e ashpërsuar financiare të post-Brexit nënvizohet nga Fondi Monetar Ndërkombëtar në një raport të errët ku thuhet se ekonomia e tretë më e madhe e Eurozonës do të vuajë nga pothuajse dy dekada stanjacion përpara se të nisë të marrë veten nga humbjet e nisura me krizën e vitit 2008.
Bankat italiane vuajtën nga humbje të rënda së fundmi, pasi BE këmbënguli se qeveria e qendrës së majtë të Matteo Renzit t’u bindej rregullave që limitojnë qëllimin e Romës për të ndihmuar bankat e vendosura nën një barrë të rëndë nga kreditë e këqija, këto të fundit janë krijuar për shkak të stanjacionit ekonomik të këtyre viteve.
FMN thotë se Italia “po rimëkëmbet gradualisht nga një recession i thellë”, por procesi i shërimit me gjasa do të zgjasë dhe do të jetë plot me rreziqe. Organizata përdoror nenin e katërt të konsultimeve për të nënvizuar se Italia është e ndjeshme ndaj një koktejli rreziqesh që mund të kenë edhe efekte shkatërrimtare për pjesën tjetër të Europës dhe botës.
Parashikimi i FMN-së thotë se do të duhet kohë deri në mesin e viteve 2020 përpara se ekonomia e Italisë të rikthehet në nivelin e para 2007. Gjatë kësaj periudhe të rikuperimit të ngadalshëm, vendi do të ketë një rritje të ulët krahasuar me vende të tjera të eurozonës, ndërsa bankat do të vijojnë të jenë shumë të ekspozuara ndaj tronditjeve ekonomike.
Vota Brexit që bën që Britania e Madhe të largohet nga Bashkimi Europian ka bërë që investitorët të fokusohen në problemet e sektorit të bankave italiane, duke pasur frikën se rikthimi i trazirave në eurozonë mund të sjellë rritje më të ulët, një valë të re falimentimesh. Banka më e madhe e Italisë Unicredit ka humbur një të tretën e vlerës së saj që prej 23 qershorit dhe aksionet kanë rënë vetëm në një ditë më 4 për qind.
Italia është në bisedime me Komisionin Europian për të lejuar mbështetje publike ndaj huadhënësve të saj të dobët, përfshirë banka si Monte dei Paschi di Siena. Ndihma shtetërore ndaj bankave lejohet nga rregullat e Bashkimit Europian vetëm në rrethana të jashtëzakonshme kur ka një shqetësim serioz në ekonomi.
Roma është përpjekur të përmbajë presionin ndaj bankave që prej Brexit, duke thënë se nuk përjashtohet ndihma shtetërore. Por kjo ide nuk është pritur mirë në Bruksel, ministrat e eurozonës thanë se problemet me bankat në Itali nuk janë ende aq serioze saqë Renzi të shkelë rregullat.
Vetëm në rrethana të jashtëzakonshme mundet që një qeveri europiane të japë ndihmë për biznese individuale apo një sektor të ekonomisë, për shkak të shqetësimit se ndihma të tilla apo paketat e shpëtimit mund të dëmtojnë konkurrencën. Por presidenti i eurogrupit, Jeroen Dijsselbloem tha se nuk sheh krizë akute. “Rregullat janë të qarta dhe ato janë strikte”.
Mes shenjave se Italia mund të përgatitet për të pasur një konfrontim me BE-në, ministri italian i Financave, tha se Roma do të sigurojë interesat e qytetarëve që kanë kursimet e tyre në banka. Qeveria përballet me një referendum të fortë për reformat kushtetuese gjatë këtij viti, mbi të cilin varet edhe fati politik i Renzit, kështu që nuk mund t’i lejojë vetes të zemërojë investitorët.
Përgatiti: Juli Prifti – /tesheshi.com/
