Presidenti i Këshillit Evropian Charles Michel paralajmëroi se të gjitha “opsionet mbeten në tryezë” për të mbrojtur interesat e Bashkimit Evropian nëse Turqia nuk është konstruktive në zgjidhjen e mosmarrëveshjes në Mesdheun lindor.
Greqia, një anëtare e BE dhe Turqia, një partnere në NATO, janë aktualisht në mosmarrëveshje rreth caktimit të një zone të shfrytëzimit të gazit në Mesdheun lindor.
Çështja do të diskutohet në samitin e BE të enjten dhe të premten në Bruksel.
Michel tha në një ftesë në samit se darka e udhëheqësve të BE të enjten në mbrëmje do t’i kushtohej ekskluzivisht situatës në Mesdheun lindor dhe marrëdhënieve me Turqinë.
“Qëllimi ynë është të krijojmë hapësirë për një dialog konstruktiv me Turqinë, në mënyrë që të arrijmë stabilitetin dhe sigurinë në të gjithë rajonin dhe të garantojmë respektimin e plotë të sovranitetit dhe të drejtave sovrane të të gjitha vendeve anëtare të BE,” tha Michel.
Presidenti i Këshillit Evropian shtoi se kjo është e mundur vetëm nëse Turqia është konstruktive.
“Të gjitha opsionet mbeten në tryezë për të mbrojtur interesat legjitime të BE dhe anëtarëve të saj,” shtoi Michel.
Përveç Mesdheut lindor, samiti i BE do të përqëndrohet në situatën në Bjellorusi, helmimin e udhëheqësit rus të opozitës Alexei Navalny dhe situatën në rajonin e Nago-Karabakut, ku forcat e sigurisë së Azerbajxhanit dhe Armenisë po përplasen ashpër. /tesheshi.com/
