Kreu i KQZ-së Ilirian Celibashi paralajmëroi se nuk do lejohen persona me cellular në qendrat e votimit.
“Asnjë votues me celular nuk do të lejohet të hyjë në qendrën e votimit. Kushdo që shfaqet do konsiderohet si tentativë për fotografuar votën dhe do të ndiqet. Është një masë parandaluese në kuadër të luftës që të gjithë po bëjnë për të frenuar shitblerjen e votës”, tha ai në një deklaratë për mediat.
Por i pyetur se “si do t’ia ndaloni telefonin votuesve?”, Celibashi u përgjigj:
“Komisioni nuk do kontrollojë votuesit. Një votues nuk do të lejohet që ai të futet në qendër me telefon. Nëse ne nuk të shikojmë me telefon në dorë prezupozohet që nuk e ke. Por çdo gjest i cili tregon se je në posedim të një telefoni dhe e prezanton në qendër kjo do konsiderohet si tentativë për të fotografuar votën”.
Nga ana tjetër, ai paralajmëroi për shitblerjen e votës.
“Ka patuar thirrje të herëpashershme nga KQZ dhe faktori ndërkombëtar, por edhe nga subjekte politike për t’i thënë ndal fenomenit të shitblerjes së votës. Nuk e di me siguri se nuk i kemi mjetet dhe mundësitë për ta verifikuar.
Kjo problematikë qëndron, por që si ai që e shet dhe ai që e blen është në pozitën që nesër pasnesër do të ketë penalitete dhe sanksione shumë të rënda. Shpresoj që kjo të dëgjohet”, theksoi kreu i KQZ-së. /tesheshi.com/
