Paralajmërim i frikshëm nga “babai” i Inteligjencës Artificiale

Shkencëtari britaniko-kanadez i kompjuterave, i quajtur shpesh si “babai” i inteligjencës artificiale, Geoffrey Hinton, ka paralajmëruar se shanset që AI të çojë në zhdukjen e njerëzimit brenda tre dekadave të ardhshme janë rritur.

Hinton, i cili këtë vit u nderua me Çmimin Nobel në Fizikë për kontributin e tij në zhvillimin e Inteligjencës Artificiale, vlerësoi se ka një shans 10% deri në 20% që teknologjia të shkaktojë pasoja katastrofike për njerëzimin.

Në një intervistë në programin Today të BBC Radio 4, Hinton theksoi se shpejtësia e zhvillimit të teknologjisë është “shumë më e shpejtë” nga sa priste. Kur u pyet nëse i ka rishikuar vlerësimet e tij, ai u përgjigj: “Jo shumë, 10% deri në 20%.

Ish-sekretari i Thesarit, Sajid Javid, i cili drejtoi programin, komentoi se gjasat dukeshin të rriteshin, me Hinton duke rënë dakord: “Asnjëherë nuk na është dashur të menaxhojmë diçka më të zgjuar se ne”.

Hinton shpjegoi se inteligjenca njerëzore do t’i ngjajë asaj të një fëmije të vogël në krahasim me inteligjencën e sistemeve të fuqishme të AI. “Mendoni veten në lidhje me një fëmijë tre vjeçar. Ne do të jemi tre vjeçarët”, tha ai në mënyrë karakteristike.

Hinton ngjalli interes global vitin e kaluar kur dha dorëheqjen nga pozicioni i tij në Google për të folur më hapur për rreziqet e zhvillimit të pakontrolluar të AI. Që atëherë, ai ka shprehur shqetësime të forta për përdorimin e teknologjisë nga “aktorët keqdashës” dhe potencialin që sistemet e përgjithshme të inteligjencës artificiale t’i shpëtojnë kontrollit njerëzor, duke paraqitur një kërcënim ekzistencial.

Duke reflektuar mbi evolucionin e inteligjencës artificiale, Hinton deklaroi se ai nuk priste që teknologjia të kishte arritur nivelin e saj aktual kaq shpejt. “Situata tani është se shumica e ekspertëve në këtë fushë besojnë se brenda dy dekadave të ardhshme, ne ndoshta do të zhvillojmë AI që është më i zgjuar se njerëzit. Dhe ky është shumë e frikshme”.

Hinton bëri thirrje për rregullimin e teknologjisë nga qeveria, duke argumentuar se mbështetja në “dorën e padukshme” të tregut dhe motivi i fitimit nuk mjafton për të siguruar zhvillimin e saj të sigurt. “E vetmja forcë që mund t’i detyrojë kompanitë e mëdha të investojnë më shumë në sigurinë është rregullimi nga qeveritë,” tha ai.

Pavarësisht shqetësimeve të Hinton, ekspertë të tjerë, si Jan LeCun, shkencëtari kryesor i AI në Meta, kanë një pikëpamje të ndryshme. LeCun deklaroi se AI “mund ta shpëtojë njerëzimin nga zhdukja”, duke zvogëluar shqetësimin për kërcënimet ekzistenciale. /tesheshi.com/