Krerët e Byrosë Federale të Hetimit të SHBA (FBI) dhe Shërbimit të Sigurisë Britanike, i njohur si MI5, paralajmëruan për rritjen e spiunazhit ekonomik kinez në Perëndim në një fjalim të rrallë të përbashkët në selinë e inteligjencës britanike në Londër, ndërsa Pekini hodhi poshtë akuzat si të pabaza.
Duke iu drejtuar përfaqësuesve të botës së biznesit në Thames House, drejtori i MI5, Ken McCallum dhe drejtori i FBI, Chris Wray pohuan se kërcënimi i spiunëve kinezë nuk ndalet së rrituri.
Sipas McCallum, shërbimi i brendshëm i inteligjencës britanike MI5 ka rritur operacionet e lidhura me Kinën.
“Ne po kryejmë shtatë herë më shumë hetime të lidhura me Kinën sot sesa në vitin 2018”, tha ai.
Ai shtoi se shërbimet e inteligjencës së Kinës operojnë ngadalë dhe me durim dhe se pak janë të vetëdijshëm se ato janë në shënjestër.
“Aktualisht, aktivitetet armiqësore po zhvillohen në tokën britanike”, tha McCallum, duke shtuar se dija, teknologjia, kërkimi dhe të ngjashme janë në shënjestër.
Wray shtoi se kërcënimi kinez është “kompleks, i përhershëm dhe i gjithëpranishëm”, i rrezikshëm për SHBA-në dhe Britaninë e Madhe, por edhe për aleatët e tjerë.
Kina është “e vendosur të vjedhë teknologjinë tuaj … dhe ta përdorë atë për të minuar aktivitetet tuaja dhe për të dominuar tregun tuaj,” tha ai.
McCallum dhe Wray paralajmëruan gjithashtu se një pushtim kinez i Tajvanit do të prishte ndjeshëm tregtinë dhe industrinë botërore.
Ata u bënë thirrje përfaqësuesve të botës së biznesit që të jenë të kujdesshëm dhe të vënë në dukje kërcënimet e mundshme.
“Partia Komuniste e Kinës është e interesuar për sistemet tona demokratike, mediatike dhe gjyqësore. Jo për t’i imituar, për fat të keq, por për t’i përdorur në avantazhin e saj”, tha McCallum.
Pekini, përmes ambasadës së tij në Londër, i hodhi poshtë këto akuza, duke i quajtur ato “të pabaza”.
“Aferat e supozuara për të cilat ata folën janë vetëm perde tymi”, shkroi një zëdhënës i ambasadës kineze në Britaninë e Madhe në një deklaratë të publikuar në faqen e internetit të misionit diplomatik.
“Ata po përhapin të gjitha llojet e gënjeshtrave për Kinën me qëllim që të njollosin sistemin politik kinez, të rrisin ndjenjën anti-kineze dhe përjashtimin e saj dhe të largojnë vëmendjen e publikut dhe të mbulojnë veprimet e tyre të turpshme”, shtoi ai. /tesheshi.com/
