Paralajmërim amerikan ndaj Wagner-it në Afrikë

Shtetet e Bashkuara “shumë shpejt” do të shpallin veprime për të mbajtur përgjegjës grupin paraushtarak Wagner, njoftoi Departamenti i Shtetit.

Sipas raportimeve, veprimet kanë të bëjnë me aktivitetet e këtij formacioni paraushtarak rus në Afrikë dhe nuk do të lidhen me rebelimin e dështuar në Rusi gjatë fundjavës, raporton Reuters.

Duke folur në një konferencë për shtyp, zëdhënësi i Departamentit të Shtetit, Matthew Miller nuk specifikoi se cilat ishin veprimet, por tha se ato do të njoftoheshin këtë javë.

Wagner aktualisht ka dhjetëra mijëra rekrutë që bëjnë punë të pista në disa vende të botës. Në Siri, Wagner mbështet presidentin Bashar al-Assad, ku është e pranishme edhe ushtria ruse. Grupi hyri në Venezuelë në vitin 2019 për të mbrojtur presidentin Nicolas Maduro. Në Mali, ata drejtohen kundër rebelëve.

Mijëra luftëtarë Wagner janë të pranishëm në Afrikë, ku grupi fiton para duke ofruar shërbime sigurie për disa qeveri dhe duke tregtuar “diamante gjaku”, ar, lëndë druri dhe armë, sipas All Eyes on Ëagner, një grup monitorues mercenar francez.

Krijuar në vitin 2014, në kohën e aneksimit rus të Krimesë, Wagner u regjistrua zyrtarisht në Shën Petersburg si një kompani konsulence. Themeluesi i grupit, Yevgeny Prigozhin, përshkruhet nga gazetari Ilya Barabanov si një shembull i një historie tipike për “një bandit nga Shën Petersburgu që arriti të ngrihej nga fundi në majat e pushtetit shtetëror”.

Ndërsa ishte pronar i disa restoranteve, Prigozhin u bë i afërt me Vladimir Putin.

Pas rebelimit të Wagner-it të shtunën kundër ushtrisë ruse, Prigozhin u zhvendos në Bjellorusi. /tesheshi.com/