Ekonomia nuk ishte ndër temat më vete të Kongresit socialist ende në zhvillim. E në ka një cen të madh në qeverisjen e Ramës, është pikërisht ekonomia.
I pafajshëm deri diku mbi rënien e saj – ndryshimi i shumë konteksteve edhe globale – Rama mban përgjegjësi për atë pjesë ende të pandjeshme në ekonomi, e cila ka të bëjë me një rigjallërim të saj.
Vetë Rama promovon tezën e njerëzve “që s’hanë statistika”, e pa u ngatërruar apo kamufluar në këto të fundit, është e lexueshme dhe e konstatueshme me sy të lirë, ajo që sot shqiptarët kanë më pak para në xhepa se sa dje.
Ndërsa biznesi gjithashtu, nuk është në ditët e mira, duke u ankuar gjithnjë e më shumë për shtrëngesa të paarsyeshme fiskale, apo korrupsion nga “banda taimorësh”, që mbi të gjitha, më grykësinë e tyre, i faturojnë “shefit të madh” – pra kryeministrit – perceptimin e një të korruptuari, gjë të cilën ai e refuzon gjithnjë me ashpërsi, duke u përbetuar se kurrë nuk ka futur duart në xhepat e dikujt.
E ndërkohë, ekonomia, ajo që është më impaktivja, më e ndjeshmja në perceptimin e një qeverisjeje, po mungon të jetë temë debati dhe në rastet e ballafaqimit mediatik të Ramës.
Kujtoni kur ai u lutej moderatorëve në raste prononcimesh në studio për të diskutuar pikërisht mbi ekonominë. Kjo nuk ndodh më, ndërkohë që duhej të qe në rend të parë të çdo debati.
Ringjallja e pretenduar ekonomike mund të jetë deri më tani dështimi më i madh i Rilindjes. Ekonomia është frymë para se të jetë statistikë, e kjo frymë mungon. Kjo frymë përkthehet në entuziazëm shoqëror, e që sot është në kuotat më të ulëta. Pse? Sepse ka më pak para në xhepa, që është njëherësh dhe një prej arsyeve të një irritimi apo zhgënjimi të disa niveleve shoqërore karshi qeverisjes.
Për ta kuptuar më mirë këtë situatë, mjafton një skenë nga filmi “Përballimi”. Kamarieri në një lokal i cili merr një porosi, shfaqet si referenca më e saktë në emër të konsumit, se ekonomia, paraja në xhepa, është ajo që përcakton uljen e ngritjen e entuziazmit shoqëror, më shumë se çdo gjë tjetër.
Vëreni Trump-in: paçka anës kontraverse të tij, amerikanët sot kanë më shumë para në xhepa nën qeverisjen e tij, e kjo me gjasë do i japë dhe një tjetër mandat.
Por shikoni videon që duhet të jetë një leksion kritik për qeverisjen e Ramës, në pikën më të ndjeshme: ekonominë.
Eshtë kjo ekonomi e munguar që gati po asfikson qytete të tëra, të cilat po shkojnë drejt mosekzistencës. /tesheshi.com/
https://youtu.be/Ia5T8tRyNhw
