Ramush Haradinaj dhe Kadri Veseli të cilët janë bërë bashkë për të fituar zgjedhjet e parakohshme të 11 qershorit, ndonëse po japin premtime të shumta para qytetarëve, në një pikë që siç duket nuk janë dakorduar.
Bëhet fjalë për marrëveshjen e Demarkacionit me Malin e Zi, për të cilën Haradinaj disa herë ka thënë se mbetet i palëkundur në qëndrimin e tij se version i Murat Mehës, kryetarit të komisionit qeveritar për shënjimin e kufirit, është gabim dhe duhet rrëzuar.
“Duhen vota për Demarkacionin, për ta rrëzuar atë në kokërr të shpinës”, e përsëriti edhe sot Haradinaj gjatë vizitës në Obiliq.
Por është interesant se për temën në fjalë po hesht Veseli i PDK-së, i cili ende nuk ka dhënë mendimin se çfarë do bëhet me çështjen e mprehtë të kufirit me Malin e Zi, që qeveria e kaluar, por edhe presidenti Thaçi e mbrojnë, nëse marrin pushtetin.
Mbetet të shihet nëse në tetë ditët e mbetura të fushatës do flasë edhe Kadria për Demarkacionin dhe të tregojë se është apo jo në një vijë me Ramushin. /tesheshi.com/
