Ky fillimshtatori e risjell sërish në qendër të botës shqiptare figurën e Nënë Terezës, alias Gonxhe Bojaxhi, gruas pra me origjinë shqiptare, për të cilën pretendojnë se e kanë të tyren edhe maqedonasit, meqë ajo ka lindur në Shkup e jo vetëm për këtë arsye. Vatikani do e shpallë atë shenjtore, në bazë të ca kritereve mbi mrekullitë në besimin katolik.
Ç’prej kur u shfaq si “nobeliste shqiptare”, humaniste me famë botërore, aty në fundi i viteve ’80-të dhe fillimi i ’90-ës, “Nëna e madhe” i ka ndarë shqiptarët në dy grupime, apo më saktë vetë shqiptarët janë ndarë prej saj në dy linja perceptimi mbi të: një pjesë që e konsiderojnë krenari kombëtare, ku madje edhe humanitetin e saj të jashtëzakonshëm ia atribuojnë pikërisht këtij fakti – pra që ajo është shqiptare (me pretendimin e nënkuptuar që po të kish qenë diç tjetër, as që bëhej fjalë të kishte çuar atë lloj jete në shërbim të të sëmurëve dhe vobektëve; e pjesa tjetër që thonë se ajo vërtet ka qenë një grua e jashtëzakonshme, por që nuk ka pse imponohet si një “shenjtore nacionale”, derisa të gjithë aktivitetin e ka kryer në Indi, e madje edhe është indianizuar deri diku nga pikëpamja shoqërore e sociale, ndërsa misionin e ka patur krejt të frymëzuar e motivuar mbi baza fetare.
Megjithatë, Nënë Tereza është “instaluar” tashmë në konstruktin shpirtëror të kombit, por kjo vetëm nga pikëpamja zyrtare më tepër. Në aspektin shoqëror, ajo nuk ka mundur të jetë një referencë pozitive për shqiptarët. Edhe pse thënie të saj citohen sipas rastit, ajo si figurë ka zënë vend në një lloj shprehie të rëndomtë rruge që nuk i bën nder.
Kur është rasti që shqiptari të tregojë se nuk mund t’i bëjë gjërat pa shpërblim, e që në këtë kontekst nuk mund ta marrë kush për budalla, e ka në majë të gjuhës të thotë: “Pse ore, Nënë Tereza jam unë..?!”, ose në variante të përafërta sipas rastit, si: “Mos kujton se jam Nënë Tereza…?!” apo “Unë nuk jam Nënë Tereza…!”.
Dhe ky është një rast për t’u studiuar nga sociologjia botërore, se si mundet që ndërsa populli prej së cilës ajo e ka origjinën e trajton si “shenjtore nacionale”, nga ana tjetër e përçmon figurën e saj duke e konsideruar simbol naviteti! /tesheshi.com/
