Bullgaria denoncoi faktin që Rusia po përpiqet të ndajë e të dobësojë Europën, ndërsa së fundmi, mjaft fakte dhe të dhëna po tregojnë për një interes të shtuar të rusëve në pjesën lindore të Bashkimit Europian. Presidenti bullgar në një intervistë të fundit me BBC-në, thotë se ndikimi rus në vendin e tij dhe në të gjithë kontinentin është shqetësues dhe Europa duhet të përshtasë një linjë më të ashpër në këtë përballje.
Rosen Plevneliev, presidenti në detyrë i Bullgarisë deri në mbajtjen e zgjedhjeve të së dielës, theksoi se vendi i tij ka qenë shënjestër e një sulmi kibernetik gjatë referendumit dhe zgjedhjeve lokale të vitit të kaluar, që sipas tij, ka shumë gjasa të jetë i lidhur me Rusinë.
Europa nuk është rikthyer në Luftën e Ftohtë, beson presidenti bullgar, por në vend të kësaj është përfshirë në një përballje të rrezikshme dhe të paparashikueshme që ai e quan “Paqe e Ftohtë”.
Rreziku, sipas tij, tashmë nuk janë tanket ruse që pushtojnë Europën por më shumë tek ndikimi rus që po ndan kontinentin.
“Loja në Europën e sotme nuk është rreth një lufte në shkallë të gjerë ku ushtritë qëllojnë armikun, por loja e Putinit për të krijuar varësi të shteteve të tjera ndaj Moskës”.
“Ajo që Rusia po përpiqet të arrijë është dobësimi i Europës, ndarja e saj dhe shndërrimi i vendeve tona në të varura”, tha ai.
Bullgaria mban raundin e parë të zgjedhjeve presidenciale më 6 nëntor. Rrugët e kryeqytetit Sofje mbajnë shenjat e një ndikimi të fortë rus në këtë vend, që dikur ka qenë pjesë e bllokut sovjetik por që tashmë është anëtare e BE-së dhe e NATO-s.
Cilin drejtim duhet të mbajë vendi është një nga çështjet thelbësore në këtë fushatë zgjedhore dhe presidenti aktual ka zemëruar mjaft njerëz në vendin e tij me kritikat që ka ndërmarrë ndaj Moskës.
Rreth 20 deri në 25 për qind e ekonomisë bullgare është e lidhur me Rusinë, sipas Martin Vladimirov, analist në qendrën për studime demokratike në Sofje dhe një nga autorët e librit “Libri i rregullave të Kremlinit”, një raportim për ndikimin rus në rajon.
“Rusia ka qenë në gjendje të përcjellë ndikimin e saj ekonomik për të kontrolluar institucione të rëndësishme në vend”, thotë
Vladimirov, duke argumentuar se paratë ruse janë përdorur për të financuar protesta dhe drejtpërsëdrejti për të ndryshuar ligjet.
Ndërkaq, presidenti bullgar beson se mjetet kryesore të Rusisë në të gjithë Europën përfshijnë financimin e partive populiste dhe lëvizjeve politike të ekstremeve, propagandë të shtuar dhe sulme kibernetike për të destabilizuar kundërshtarët.
Tetorin e kaluar, Bullgaria ishte në shënjestër të një sulmi masiv kibernetik. “Ishte sulmi më i rëndë dhe intensive që është kryer në juglindje të Europës”, thotë ai.
“Unë e konsideroj një sulm ndaj demokracisë bullgare”, tha ai për BBC-në, duke argumentuar se sulmi ishte dizenjuar për të shkaktuar konfuzim rreth rezultateve të zgjedhjeve, diçka që tashmë po artikulohet si druajtje edhe për zgjedhjet amerikane të martën e ardhshme.
Ndihma e aleatëve të NATO-s e ka lënë presidentin bullgar me pak dyshim se kush mund të jetë pas sulmit. “E njëjta organizatë që sulmoi Bundestagun, duke vjedhur të gjitha emailet e anëtarëve të parlamentit, e njëjta organizatë që sulmoi selinë qendrore të NATO-s, dhe e njëjta që është përpjekur të ndikojë në zgjedhjet amerikane e kështu sipas të gjitha gjasave, mund të drejtojmë gishtin në lindjen tonë”, thotë ai.
Prej asaj kohe, Bullgaria ka hartuar një strategji të re të mbrojtjes kibernetike që presidenti beson se do ta mbrojë vendin nga përpjekje të reja, edhe për zgjedhjet e së dielës.
Makineritë e votimit elektronik përdoren në disa zona, por jot ë lidhura me internetin, dhe kështu rreziku kryesor është ai i përhapjes së konfuzionit më shumë sesa ndikimi i rezultatit.
Sipas presidentit Plevneliev, sigurimi i një fronti të qëndrueshëm nga ana e BE-së kundrejt Rusisë është vital.
“Nato është e fuqishme. Unë do të dëshiroja, gjithashtu, që edhe Bashkimi Europian të ishte më i fuqishëm dhe më i bashkuar për problemet që kemi sot”, thotë ai.
Përgatiti: Juli Prifti – /tesheshi.com/
