Këto ditë, bota e futbollit është ballafaquar me tragjedinë e
zhdukjes së lojtarit argjentinas Emiliano Sala, i cili po fluturonte me një
avion të vogël nga Franca për në Angli mbi La Manche, vetëm ai dhe piloti.
Kërkimi për Salan ka përfunduar zyrtarisht, edhe pse ende nuk është konfirmuar
se lojtari është i vdekur.
Pyetja që mbetet në ajër është: Çfarë do të ndodhë me 20 milionë eurot e transferimit të tij nga Nantes në Cardiff?
Ishte pikërisht ky transferim dhe motivi i udhëtimit me avion
që rezultoi fatal.
Sala nënshkroi një kontratë me klubin uellsian dhe u zyrtarizua si lojtar i
tij. Por pyetja është: a është përfunduar transaksioni i parave?
Transferimi konsiderohet zyrtarisht i përfunduar nga momenti i regjistrimit në
FIFA. Në rastin e shitjes, nga klubi francez thuhet se “marrëveshja u nënshkrua të shtunën më 19 janar në orën 17.00 dhe u
miratua të hënën me 21 janar, në kohën e zhdukjes së lojtarit”. Në teori,
kjo do të thotë se Cardiff duhet të paguajë transferimin prej 17 milionë paund
(rreth 20 milionë euro).
“Marrëveshja për transferimin e
parave hyn në fuqi nga momenti i regjistrimit. Nëse është kështu, në parim
Cardiff duhet të paguajë 17 milionë paund te Nantes, edhe nëse lojtari është
zhdukur”, thotë Alexandra Cohen Jonathan, avokate e çështjes.
Klubet e të mëdha u ofrojnë zakonisht lojtarëve edhe sigurimin në rast dëmtimi
dhe Nantes ka nënshkruar natyrshëm një kontratë të këtij lloji, por çështja
është nëse kjo kontratë është e vlefshme kur transferimi tashmë është
përfunduar. Por për klubin e ri a është ky sigurim në fuqi?
Pra, veç dhimbjes për lojtarin e humbur, Nantes dhe Cardiff janë gjendur dhe para një preçedenti të panjohur që i ka futur në sfida ligjore e financiare. /tesheshi.com/
