Tabloja që lanë pas zgjedhjet elektorale të 20 dhjetorit në Spanjë flet për kaos politik, për paqartësi të plotë se ç’mund të ndodhë në muajt pasues, në do shkohet sërish në zgjedhje apo do të ketë vendi një qeveri koalicioni.
Me mbledhjen e parlamentit të ri më 13 janar të vitit të ardhshëm, i takon mbretit Felipe VI të caktojë dikë për të formuar qeverinë. Por deklaratat e pas zgjedhjeve të krerëve partiakë lënë pak vend për optimizëm se mund të ketë marrëveshje mes tyre.
Partia Popullore e kryeministrit Mariano Rajoy, e dalë e tkurrur nga këto zgjedhje, duke fituar vetëm 123 vende në parlament, nga 176 që duhen më së paku për të formuar e vetme qeverinë, ka dhënë shenja se mund të pranojë një koalicion me socialistët. Këta të fundit, të dytët në këto zgjedhje, e kanë kundërshtuar hapur një mundësi të tillë. Udhëheqësi i socialistëve, Pedro Sanchez, ka deklaruar prerë se nuk ka për të mbështetur asnjë përpjekje të kryeministrit aktual për të qëndruar në detyrë nëpërmjet një koalicioni apo qeverie pakice.
Përndryshe, Podemos, partia e ekstremit të majtë dhe që doli e treta në zgjedhjet e fundit, siguroi 69 vende në parlament, dhe ka në duar çelsat e një koalicioni. Por Podemos është e vetmja parti kombëtare që mbështet referendumin për pavarësi në Katalonjë, çka shihet si një pengesë e pakapërcyeshme për një marrëveshje me ta nga socialistët.
“Ne nuk do të diskutojmë çështje mbi integritetin territorial të vendit,” ka deklaruar Pedro Sanchez, lideri i socialistëve, duke i mbyllur derën kështu Podemos-it. /tesheshi.com/
