Ministri gjerman i Mbrojtjes, Boris Pistorius, pas takimit me presidenten e Kosovës, Vjosa Osmani, tha se kërkesa ishte për deeskalim të situatës dhe vazhdimin e dialogut ndërmjet Kosovës dhe Serbisë.
Në një konferencë të përbashkët për media me Osmanin, Pistorius kërkoi nga Kosova që të deeskalojë situatën dhe ta zgjidhë problemin me dialog, pasi siç tha ai, ngritja e tensioneve nuk është në interesin e askujt.
“Sa i përket marrëdhënieve ndërmjet Serbisë dhe Kosovës, kërkesa është deeskalim. Ai theksoi se e ardhmja e Ballkanit Perëndimor është në Evropë, por kjo kërkon dialogun si kusht dhe askush nuk duhet dhe nuk mund të ketë interes për të rrezikuar më tej situatën. Prandaj, duke marrë parasysh tensionet aktuale me Serbinë dhe minoritetin serb në Kosovë, ne bëjmë thirrje të qartë për maturi dhe kujdes”, theksoi Pistorius.
Ministri gjerman tha se e kupton padurimin e Kosovës, por se sa i përket Rregullores për euron si valutë e vetme, më mirë do të ishte që qytetarëve t’u jepej një afat më i gjatë se një muaj për të rregulluar çështjen.
Ai tha se Kosova ka të drejtë të zbatojë ligjet e veta, por deeskalim bëhet edhe me masa administrative siç është vendosja e euros si valutë e vetme.
Megjithatë, sipas Pistorius, nevojiten komunikime dhe informacione më adekuate në mënyrë që askush të mos ketë frikë. Ai shtoi se këto janë garanci sigurie.
Pistorius theksoi se zbatimi i Marrëveshjes së Ohrit dhe përparimi në marrëdhëniet ndërmjet Kosovës dhe Serbisë është i domosdoshëm.
Nga ana e saj, Osmani ka thënë se Serbia nuk është dënuar edhe pse është dëshmuar se qëndron pas sulmit dhe agresionit të 24 shtatorit në Banjskë dhe se “në vend të ndjekjes së terroristëve, vazhdon t’i inkurajojë ata të destabilizojnë Kosovën dhe rajonin”.
Osmani ka theksuar se Kosova për këtë ka nevojë për mbështetjen e Gjermanisë.
“Nuk ka pasur masa ndaj Serbisë”
“Vendimi për shtimin e trupave ushtarake të Gjermanisë është pasqyrë e qartë e mbështetjes për popullin tonë, por në të njëjtën kohë edhe e përpjekjeve tona të përbashkëta për paqen, stabilitetin dhe sigurinë afatgjatë në rajonin tonë”, theksoi Osmani.
Ajo ka theksuar se kufiri ndërmjet Kosovës dhe Serbisë duhet të ruhet për të qenë i sigurt dhe se veprimet e Serbisë varen nga kundërpërgjigjja dhe pas sulmit në Banjskë nuk ka pasur asnjë masë ndaj Serbisë.
Presidentja e Kosovës tha se institucionet paralele të Serbisë në Kosovë është dashur të shfuqizohen shumë kohë më parë, por Serbia nuk i ka shfuqizuar por i ka forcuar. /tesheshi.com/
