Papa Françesku u bëri thirrje udhëheqësve europianë të djelën për t’i dhënë fund polemikave mbi fatin e 49 emigrantëve “të mbërthyer” në dy anije humanitare të shpëtimit në Detin Mesdhe dhe për t’u siguruar atyre një port të sigurt.
“Unë ftoj sinqerisht drejtuesit europianë që të tregojnë solidaritet konkret me këta njerëz”, tha Papa përpara dhjetëra mijëra njerëzve të mbledhur në Sheshin e Shën Pjetrit në Romë, raporton Reuters.
Në bordin “Sea-Watch 3” ka 32 emigrantë, të cilët u shpëtuan nga anija e kontrabandistëve më 22 dhjetor, jo larg nga bregu i Libisë.
Disa ditë më vonë, një anije private shpëtoi 17 emigrantë në jug të Detit Mesdhe.
Malta nuk lejon që emigrantët të zbarkojnë në brigjet e saj dhe pretendon se janë shpëtuar jashtë zonës së kërkim-shpëtimit nën juridiksionin e saj.
E nga ana tjetër, ministri i Brendshëm italian dhe njëherësh kreu i LIGA-s, Mateo Salvini tha se Italia nuk do të pranonte asnjë emigrant. /tesheshi.com/
