Kreu i Kishës Katolike, Papa Françesku bëri thirrje për lëshimin e vizave të përkohshme për emigrantët që largohen nga vendet në të cilat po zhvillohen konflikte të armatosura.
“Do të ishte mirë të parashihet një mundësi e lëshimit të vizave të veçanta të përkohshme për njerëzit që ikin nga konfliktet në vendet fqinje”, tha Papa me rastin e Ditës Botërore të Emigrantëve dhe Refugjatëve.
Ai paralajmëroi se dëbimi i emigrantëve dhe refugjatëve nuk përfaqëson një zgjidhje adekuate për çështjen e tyre. “Dëbimi kolektiv dhe arbitrar i emigrantëve dhe refugjatëve nuk përfaqëson një zgjidhje adekuate, sidomos për shkak se këta njerëz dëbohen në vendet të cilat nuk mund të garantojnë as dinjitet dhe as respektimin e të drejtave themelore të njeriut”, ka thënë kreu i Vatikanit.
Ai theksoi se më shumë vende duhet të përpiqen për të hapur, siç tha ai, “korridore humanitare për më të pambrojturit në mesin e emigrantëve dhe refugjatëve”.
Më në fund, ai theksoi se refugjatët duhet të kenë një formë të kujdesit shëndetësor. “Në një vend që pranon refugjatët, të huajt duhet të kenë të drejtën për kujdes shëndetësor dhe duhet të përfshihen në sistemin e pensioneve”, shkruan Papa Françesku, duke shtuar se ata duhet të lejojnë lirinë e praktikimit të fesë që ata zgjedhin. /tesheshi.com/
