Kreu i Kishës Katolike ka pritur të shtunën në Vatikan qindra fëmijë. Shumica e tyre ishin italianë, por kishte dhe emigrantë.
Duke iu drejtuar fëmijëve, Papa Francesku tha se refugjatët nuk ishin të rrezikshëm, por në rrezik, duke kërkuar më tepër dhembshuri ndaj tyre.
Mes fëmijëve ishte dhe një nigerian, Osayande, i cili ishte marrë dhe mbahej në shtëpi nga një familje italiane, pasi i kishte humbur prindërit gjatë udhëtimit në det.
Papa do t’u tregonte fëmijëve një jelek shpëtimi të sjellë nga një shpëtues spanjoll, që nuk kishte mundur ta mbante në jetë një vajzë të vogël.
“Ai më solli këtë jelek shpëtimi,” rrëfeu Papa Francesku, “dhe duke qarë, më tha, ‘Atë! Nuk ia dola. Në det ishte një vajzë e vogël, dhe nuk qeshë në gjendje ta shpëtoja. Gjithçka që mund të arrija ishte jeleku i saj i shpëtimit.’”
Ngrohja e motit ka risjellë vërshimin e refugjatëve përmes detit. Vetëm këtë javë janë shpëtuar mbi 13.000 njerëz, të nisur me lloj-lloj mjetesh lundruese për të arritur brigjet italiane.
Papa do ta përshkruante udhëtimin e tij në Lesbos muajin e shkuar si të karakterizuar nga pikëllimi. Ai i ka kundërshtuar politikat e një sërë vendeve që kërkojnë t’i bllokojnë refugjatët në kufi.
Vitin e shkuar, Papa do ta quante sulm kundër jetës lënien e refugjatëve që të vdisnin në det, duke i përshkruar ata si viktima të luftës dhe padrejtësisë. /tesheshi.com/
