Në një vizitë në Gjeorgji, papa Françesku ka mbajtur një meshë në stadiumin Meshki, në Tbilisi, që përkundër kapacitetit mbajtës për 25.000 veta, ka qenë thuajse bosh.
Gjeorgjia ka një popullsi katolike prej më pak se një për qind, dhe ndjekësve të Kishës Ortodokse në vend u është kërkuar të qëndrojnë larg aktivitetit papal.
Kjo ka qenë pjesëmarrja më e ulët gjatë një predikimi të papa Françeskut në vizitat e tij në vende të ndryshme.
Patriarkata ortodokse bëri të ditur në faqen e saj elektronike se, “Për sa kohë ka dallime dogmatike midis dy kishave, besimtarët ortodoksë nuk do të marrin pjesë në lutjet e tyre.”
Presidenti gjeorgjian, Giorgi Margvelashvili, ishte i pranishëm në meshën e Papës, por shumë politikanë të tjerë të vendit munguan.
Azerbajxhani është ndalesa e kreut të Kishës Katolike të dielën, në një vend me shumicë dërrmuese muslimane, e ku ka vetëm disa qindra katolikë. /tesheshi.com/
