Kreu i botës katolike ka shprehur shqetësimin për një aleancë, siç e ka cilësuar “shumë të rrezikshme” mes SHBA-së dhe Rusisë, me arsyetimin se udhëheqësit e saj bëjnë pjesë ndër ata që kanë një “vizion të shtrembëruar të botës” kur është fjala për emigracionin.
“Jam i brengosur për aleanca shumë të rrezikshme midis pushteteve që kanë një vizion të shtrembëruar të botës: Amerika dhe Rusia, Kina dhe Koreja e Veriut, Putin dhe Assad në lidhje me luftën në Siri”, tha Papa për La Repubblica-n.
“Rreziku ka të bëjë me imigracionin”, shtoi ai. “Problemi ynë kryesor dhe për fat të keq në botë sot është ai i të varfërve, të dobtëve dhe të përjashtuarve, i cili përfshin edhe emigrantët”, ka theksuar Papa Françesku.
Qëndrimet e tij erdhën në kuadër të takimit Trump – Putin, që gjithsesi nuk prodhoi asgjë, të paktën publikisht, ku dyshja udhëheqëse e botës, vetëm thurri lavde të ndërsjellta.
Papa ka kritikuar veçanërisht Trump-in për qëndrimin e tij mbi emigracionin, duke thënë madje në një rast se ai “nuk është i krishterë”, mu për shkak të vendosmërisë së tij për të ndërtuar muret kufitare.
“Emigrantët janë vëllezërit dhe motrat tona në kërkim të një jete më të mirë, larg nga varfëria, uria dhe lufta”, shkroi Papa në llogarinë e trij Twitter.
Në intervistën e tij, kreu i vatikanit kërkoi nga udhëheqësit e Evropës, të cilën e përshkroi si “kontinenti më i pasur në të gjithë botën”, që të mos jetojnë me idenë se mund të mbyllin kufijtë e tyre. /tesheshi.com/
