Papa Françesku, rekomandoi këtë të dielë një aplikacion lutjeje të quajtur “kliko për t’u lutur”, e kjo përpara Festivalit Botëror të Ditës së Rinisë që do të mbahet në Panama e që lejon përdoruesit të ndajnë lutjet e tyre në internet.
“Interneti dhe rrjetet sociale janë një burim i kohës sonë, një mënyrë për të qëndruar në kontakt me të tjerët, për të ndarë vlerat dhe projektet dhe për të shprehur dëshirën për të formuar një komunitet”, tha Papa gjatë lutjes së tij tradicionale javore të Angelusit.
Papa Françesku do të bëjë udhëtimin e tij të parë në Panama të mërkurën, ku do të mblidhen më shumë se 150.000 katolikëve të rinj nga e gjithë bota në festivalin e Ditës Botërore të Rinisë.
“Interneti mund të na ndihmojë që të lutemi si një bashkësi, të lutemi së bashku”, tha Papa, duke iu drejtuar pelegrinëve në Sheshin e Shën Pjetrit nga një dritare në Pallatin Apostolik.
Me ndihmën e një bashkëpunëtori që mbante një iPad, Papa Françesku, 82 vjeç, bëri një shfaqje të përdorimit të aplikacionit.
“Këtu do të vendos … kërkesa për lutje për misionin e Kishës”, tha ai.
Lëshuar në vitin 2016, “kliko për t’u lutur” është në dispozicion në spanjisht, anglisht, italisht, frëngjisht, portugalisht dhe gjermanisht. Ka aplikacione për celularë për Android dhe iOS dhe është i pranishëm në mediat sociale. /tesheshi.com/
