Nuk ka fitues të vërtetë në asnjë luftë, tha Papa Françesku gjatë një vizite në Varrezat e Luftës Romake, duke iu referuar konflikteve në Lindjen e Mesme dhe Ukrainë.
Françesku përdori një karrige me rrota për të kaluar gurët e varreve dhe për të vendosur lule në varrezat, ku mbahen eshtrat e ushtarëve të Commonwealth-it që vdiqën në Itali gjatë Luftës së Dytë Botërore.
Këtë vit, Papa zgjodhi atë varrezë romake për të kremtuar meshën në kujtim të besimtarëve të vdekur në Ditën e Gjithë Shpirtrave.
“Luftërat janë gjithmonë një disfatë, gjithmonë. Nuk ka kurrë një fitore të plotë. Njëra palë mund tjetrën, por pas saj ka gjithmonë disfatë dhe një çmim që duhet paguar,” tha ai në një predikim të improvizuar gjatë një meshe në varrezat ku morën pjesë nga disa ambasadorë të Commonwealth-it.
Ati i Shenjtë bëri thirrje për një armëpushim në Gaza dhe krijimin e korridoreve humanitare për të lehtësuar vuajtjet e banorëve të saj të rrethuar.
Ai gjithashtu bëri thirrje për një zgjidhje me dy shtete për konfliktin në Lindjen e Mesme, tha se Izraeli kishte të drejtë të mbrohej nga sulmet dhe dënoi rritjen e antisemitizmit në mbarë botën.
Një varrezë në zonën e Romës, e cila ishte skena e luftimeve në rrugë gjatë Luftës së Dytë Botërore, është vendi i fundit i pushimit të rreth 425 ushtarëve nga Britania e Madhe dhe ish-kolonitë e saj që vdiqën duke luftuar në Itali. Françesku foli për tragjedinë e luftës.
“Në hyrje, pashë moshën e të vdekurve, kryesisht midis 20 dhe 30 vjeç. Jetë të shkurtuara, jetë pa të ardhme,” tha ai.
“Mendova për prindërit, për nënat që morën atë letër: ‘Zonjë, është nder t’ju them se keni një djalë hero. Po, një hero..’. Ka shumë lot në ato jetë të ndërprera”, tha ai dhe shtoi:
“E njëjta gjë po ndodh sot. Kaq shumë njerëz, të rinj dhe jo aq të rinj, në luftëra në botë, madje edhe ata më afër nesh, në Evropë dhe më gjerë… kaq shumë të vdekur.”
Por arsyetimi i Papës çalon në faktin se lufta diferencohet nga fakti nëse është e drejtë apo e padrejtë. Spse vjen një moment që duhet luftuar kundër të padrejtës, asaj që të merr pronën, dinjitetin, madje dhe jetën. /tesheshi.com/
