Papa Françesku u ka bërë thirrje qytetarëve dhe politikanëve në Bolivi që të presin në mënyrë paqësore rezultatin e procesit të rishikimit për rezultatet e zgjedhjeve të kontestuara.
Ai u tha besimtarëve dhe turistëve në Sheshin e Shën Pjetrit të dielën që të luten për situatën në një “Bolivi të dashur” në kufi me vendin e tij të lindjes, Argjentinë, raporton AP.
Papa u bëri thirrje të gjithë bolivianëve, dhe “veçanërisht aktorëve politikë dhe shoqërorë”, të presin rezultatet e rishikimit të zgjedhjeve “në një frymë konstruktive dhe atmosferë paqeje”,.
Presidenti i Bolivisë Evo Morales dha dorëheqjen të dielën dhe njoftoi se do të thërrasë zgjedhje të reja, sepse, pas fitores së tij në zgjedhjet e 20 tetorit, vendi ishte në krizë.
“Unë kam vendosur të zëvendësoj të gjithë anëtarët e Komisionit Qendror të Zgjedhjeve”, tha ai në një intervistë televizive.
Ai deklaroi se do të “thërriste zgjedhje të reja, në mënyrë që populli bolivian të zgjidhte një qeveri të re përmes një votimi demokratik”.
Presidenti bolivian ka bërë thirrje për bisedime urgjente me opozitën më herët për shkak të trazirave që tronditën vendin.
“Për të ruajtur paqen në vendin tonë të dashur, unë kërkoj urgjentisht negociata me përfaqësuesit e partive që fituan vendet në zgjedhje”, shkroi Morales në Twitter.
Komisioni Zgjedhor Bolivian ka hedhur poshtë pretendimet se janë zbuluar parregullsi në numërimin e votave, por protestuesit ende kërkojnë zgjedhje të reja.
Deri më tani, tre persona janë vrarë në trazira dhe më shumë se 300 janë plagosur. /tesheshi.com/
