Kreu i Kishës Katolike është treguar sot mjaft i ashpër me pritjen që u rezervohet refugjatëve dhe emigrantëve në vendet ku ata kërkojnë strehë.
Papa Françesku e ka kritikuar Europën për mbyllje të syve para gjendjes së refugjatëve duke i mbyllur kufijtë.
Ai i ka krahasuar qendrat e pritjes për refugjatët dhe emigrantët me kampet e përqendrimit, duke i nxitur qeveritë t’i nxjerrin ata që andej.
“Kampet e refugjatëve, shumë prej tyre, janë të (llojit të) përqendrimit për shkak të numrit të madh të njerëzve të lënë brenda tyre.”
Papa po ashtu i ka bërë thirrje pjesës veriore të Italisë për të pranuar më shumë emigrantë, duke kujtuar se Italia ka një prej përqindjeve më të ulëta të lindshmërisë në botë.
“Nëse u mbyllim gjithashtu dyert emigrantëve, kjo quhet vetëvrasje,” tha ai në një veprimtari të kësaj të shtune.
Papa Françesku njihet si një mbrojtës i spikatur i të drejtave të refugjatëve, e shpesh u ka kërkuar vendeve europiane t’u ofrojnë një pritje më me dinjitet atyre që i kanë ikur luftës, persekutimit dhe varfërisë. /tesheshi.com/
