Kreu i Vatikanit, Papa Françesku, ka bërë thirrje për një hetim për të përcaktuar nëse sulmet e Izraelit në Gaza përbëjnë gjenocid.
Papa Françesku e thotë këtë në një libër të ri, pjesë të të cilit u botuan sot.
Është hera e parë që Papa ka bërë thirrje hapur për një hetim mbi akuzat për gjenocid në Rripin e Gazës. Në shtator, ai tha se sulmet izraelite në Gaza dhe Liban ishin të pamoralshme dhe joproporcionale dhe se ushtria izraelite shkoi përtej rregullave të luftës, transmeton Anadolu.
Libri, i shkruar nga Hernan Reyes Alcaideo dhe i bazuar në intervistat me Papën, titullohet “Shpresa asnjëherë nuk zhgënjen: pelegrinë në një botë më të mire”, do të publikohet të martën para jubileut të Papës në 2025.
“Karakteristikat e gjenocidit”
“Sipas disa ekspertëve, ajo që po ndodh në Gaza ka karakteristikat e gjenocidit. Ne duhet të hetojmë me kujdes për të përcaktuar nëse i përshtatet përkufizimit teknik të formuluar nga avokatët dhe organet ndërkombëtare”, tha Papa në fragmentet e botuara nga gazeta italiane La Stampa të dielën.
Në librin e ri, Papa Françesku flet edhe për migrimin dhe problemin e integrimit të emigrantëve.
“Përballë kësaj sfide, asnjë vend nuk mund të lihet vetëm dhe askush nuk mund të mendojë ta zgjidhë këtë çështje në izolim përmes ligjeve më kufizuese dhe represive, ndonjëherë të miratuara nën presionin e frikës apo në kërkim të avantazheve elektorale. Përkundrazi, teksa shohim se ka një globalizim të indiferencës, ne duhet të përgjigjemi me një globalizim të bamirësisë dhe bashkëpunimit”, tha Papa Françesku.
Papa Françesku vë në dukje gjithashtu se plaga ende e hapur e luftës në Ukrainë kishte detyruar mijëra njerëz të largoheshin nga shtëpitë e tyre, veçanërisht gjatë muajve të parë të konfliktit. /tesheshi.com/
