Zyra e shtypit e Vatikanit dërgoi sot në media një foto të Papa Françeskut, në profil, teksa po kremtonte meshën në kapelën e spitalit Agostino Gemelli në Romë, ku u shtrua më 14 shkurt.
Është fotoja e parë e Papës që jepet për mediat, pasi ai ndodhet në spital për shkak të pneumonisë së dyfishtë.
“Po përjetoj një periudhë sprove, jam në krah të shumë vëllezërve dhe motrave të sëmurë që aktualisht ndihen të pambrojtur”, theksoi Papa Françesku në mesazhin e tij me shkrim të së dielës drejtuar besimtarëve nga Spitali Gemelli në Romë, ku ndodhet ende i shtruar.
“Trupi ynë është i dobët, por, edhe në këto rrethana, askush nuk mund të na pengojë të duam, të lutemi dhe të japim nga vetja. U bëfshim, për njëri-tjetrin, në besimin tonë, shenja të ndritshme shprese”, shtoi Papa, shëndeti i të cilit po përmirësohet.
Françesku falënderoi të gjithë besimtarët për lutjet e tyre, si dhe të gjithë mjekët dhe infermierët që po i ofrojnë kujdes në spitalin Agostino Gemelli në Romë.
Papa nuk mungoi të shprehë mirënjohjen e tij për 300 fëmijët që u mblodhën në sheshin e klinikës në mëngjes për t’i ofruar një “përqafim simbolik”.
“E di që shumë fëmijë po luten për shërimin tim, disa prej tyre kanë ardhur edhe në spital, për të më treguar se janë pranë meje. Faleminderit fëmijë të dashur. Papa të do dhe gjithmonë pret të të takojë”, theksoi Françesku. /tesheshi.com/
