Vatikani njofton se Papa Françesku do të vizitojë pas një muaji Mjanmarin, vendin ku po nënshkruhet një faqe e erët e historisë njerëzore prej vrasjeve dhe masakrave ndaj popullsisë muslimane Rohingia. Bëhet fjalë për një udhëtim nga data 6 nëntor e deri më 2 dhjetor, në shumë vende, nën moton “paqe dhe dashuri midis njerëzve të besimeve të ndryshme”.
Në Mjanmar, siç njofton Reuters, Papa do të takohet me murgjit e lartë budistë, gjeneralët ushtarakë dhe me Aung San Suu Kyi.
Kreu i botës së krishterë pritet të apelojë mbi gjendjen tragjike të popullatës Rohingia, ndërkohë që e ka bërë të qartë qëndrimin e tij në mbrojtje të pakicës muslimane për të jetuar besimin e tyre dhe ka kritikuar regjimin e vendit për fushatën e persekutimit.
Në një sulm të ashpër ndaj regjimit të Mjanmarit në shkurt, papa tha se Rohingiat janë torturuar dhe vrarë thjesht për shkak se duan të jetojnë kulturën e tyre dhe besimin e tyre musliman.
Kriza në Mjanmar shpërtheu më 25 gusht, kur ushtria vendase e mbështetur nga bandat e ekstremistëve budistë sulmuan brutalisht muslimanët në shtetin Rakhinë, me pretekstin e një përgjigjeje ndaj vrasjes së forcave të sigurisë. Veç mijra të vrarëve dhe të masakruarve, janë dhe mijra të tjerë të zhvendosur me dhunë në Bangladeshin fqinj, duke provokuar kështu dhe një krizë të rëndë humanitare. /tesheshi.com/
