Papa Françesku paralajmëroi të shtunën atë që e quajti “luftë globale” kundër martesës tradicionale dhe familjes, duke thënë se të dyja janë vënë nën sulm nga teoria gjinore (gender theory) dhe divorci.
Kryekatoliku botëror i bëri këto komente aty për aty, si përgjigje në pyetjen e bërë gjatë një takimi me një komunitet të vogël katolik në republikën ish-sovjetike të Gjeorgjisë.
“Ju përmendët një armik të madh të martesës: teorinë gjinore”, tha Papa duke iu përgjigjur pyetjes së një vajze, e cila kishte mësuar për këtë teori në shkollë.
Por kreu i botës katolike nuk elaboroi më tej në këtë temë.
Teoria gjinore është një koncept, ku një person mund të jetë biologjikisht mashkull apo femër, por ata kanë të drejtë të identifikojnë veten e tyre si meshkuj, femra, të dyja bashkë apo asnjërën.
“Sot ka një luftë globale për ta shkatërruar familjen”, tha Papa Françesku. “Jo me armë por me ide…andaj ne duhet të mbrojmë veten tonë nga kolonizimi ideologjik”.
Papa ka përdorur frazën “kolonializëm ideologjik” në të kaluarën për të denoncuar atë që, siç ai thotë, janë përpjekjet e vendeve të pasura për ta kushtëzuar ndihmën për zhvillim me pranimin e politikave sociale, të tilla si ato për lejimin e homoseksualëve dhe kontraceptivët.
Françesku, i cili ka qenë më i hapur ndaj homoseksualëve se paraardhësit e tij, por që i kundërshton martesat e tyre, tha se “martesa është gjëja më e bukur që ka krijuar Zoti”, duke shtuar se “Bibla thotë se Zoti krijoi mashkullin dhe femrën që të bëhen një mish i vetëm”.
Në të njejtën përgjigje, ai tha se rritja e numrit të divorceve po ashtu paraqet një kërcënim të madh për familjen. /tesheshi.com/
