“Qytetërimi kërkon energji, por përdorimi i energjisë nuk duhet të shkatërrojë qytetërimin”, tha Papa Françesku në fund të një konference dy ditore në Vatikan.
Konferenca, e mbajtur më dyer të mbyllura në Akademinë Papnore të Shkencave, mblodhi së bashku drejtuesit e naftës, investitorët dhe ekspertët e Vatikanit.
Ndryshimi i klimës ishte një sfidë e përmasave epokale, tha Papap, duke shtuar se bota kishte nevojë për një lloj energjie që lufton ndotjen, eliminon varfërinë dhe nxit drejtësinë shoqërore.
“Ne e dimë se sfidat me të cilat ballafaqohemi janë të ndërlidhura. Nëse duam të eliminojmë varfërinë dhe urinë … më shumë se një miliard njerëz pa energji elektrike sot duhet të kenë qasje në të”, u tha ai Papa.
“Dëshira jonë për të siguruar energji për të gjithë nuk duhet të çojë në efektin e padëshiruar të një spiraleje të ndryshimeve klimatike ekstreme me efekt një rritje katastrofike të temperaturave globale, mjedise më të ashpra dhe niveleve më të larta të varfërisë”, tha kreu i Vatikanit.
Papa Françesku, i cili shkroi një dokument madhor të quajtur “Laudato Si” për mbrojtjen e mjedisit nga ngrohja globale në vitin 2015, tha se ishte “shqetësuese” që ende vijojnë kërkimet për rezerva të reja të lëndëve djegëse.
Ai tha se kalimi në energji të pastër ishte “një detyrë që u detyrohemi milionave të vëllezërve dhe motrave tona në mbarë botën, vendeve të varfëra dhe brezave që do të vijnë”.
Papa bëri thirrje gjithashtu për një projekt të përbashkët global dhe afatgjatë.
“Problemet mjedisore dhe të energjisë tani kanë një ndikim dhe përmasa globale”, tha ai.
Në vërejtjet e tij, Papa tha se shpresonte që takimi t’u japë pjesëmarrësve mundësinë për të “rishikuar supozimet e vjetra dhe për të fituar perspektiva të reja”.
Kreu i botës katolike tha se shoqëria moderne me “lëvizjen e saj masive të informacionit, personave dhe gjërave kërkon një furnizim të pamasë energjie”. Dhe akoma, tha ai, deri në një miliard njerëz ende nuk kanë energji elektrike.
Papa tha se përmbushja e nevojave energjetike të të gjithëve në planetin duhet të bëhet në mënyra “që të shmangin krijimin e pabarazive mjedisore, që rezultoj më pas në përkeqësim dhe ndotje që është shumë e dëmshme për familjen tonë njerëzore, tani dhe në të ardhmen”.
Ai u bëri thirrje pjesëmarrësve të përdorin “aftësinë e tyre të demonstruar risi” për të adresuar “dy nga nevojat e mëdha në botën e sotme: kujdesi për të varfrit dhe mjedisin”. Ai vuri në dukje se të varfrit paguajnë çmimin më të lartë për ndryshimet klimatike, shpesh duke u detyruar të emigrojnë për shkak të cilësisë së ujit, motit të ashpër dhe një kolapsi shoqërues në bujqësi. /tesheshi.com/
