Papa Françesku u ka bërë thirrje krerëve të institucioneve financiare të botës që të ulin barrën e borxhit për vendet e varfra të prekura nga pandemia e koronavirusit dhe t’u japë atyre një rol më të madh në vendimmarrjen globale.
Në një letër drejtuar pjesëmarrësve në takimin pranveror të Fondit Monetar Ndërkombëtar (FMN) dhe Bankës Botërore, Papa shkroi se pandemia e detyroi botën të pranonte krizën e ndërlidhur, socio-ekonomike, mjedisore dhe politike.
“Nocioni i rimëkëmbjes nuk mund të nënkuptojë kthim në një model të pabarabartë dhe të paqëndrueshëm të jetës ekonomike dhe sociale, ku një pakicë e vogël e popullsisë së botës zotëron gjysmën e pasurisë,” tha Papa Françesku në një letër më 4 prill.
Ai bëri thirrje për një “plan global” të ri që “në mënyrë të pashmangshme do të thotë t’u japësh vendeve më të varfra dhe më pak të zhvilluara një rol efektiv në vendimmarrjen dhe lehtësimin e hyrjes së tyre në tregun ndërkombëtar”.
Ai shtoi se fryma e solidaritetit global “kërkon të paktën një ulje të ndjeshme të barrës së borxhit ndaj kombeve më të varfra, e cila është përkeqësuar nga pandemia”.
Shefat financiarë të 20 ekonomive më të mëdha, të mërkurën zgjatën pezullimin e kostove të shërbimit të borxhit në vendet në zhvillim, por nuk arritën të anulonin borxhin ose ta zbusnin atë me kërkesë të organizatave jofitimprurëse.
Tregjet financiare duhet të rregullohen nga ligjet dhe rregulloret që do të sigurojnë që ato të funksionojnë për të mirën e përgjithshme, tha Papa Françesku, duke bërë thirrje për “solidaritet të financuar drejt me vaksinat”.
“Ne nuk duhet të lejojmë që ligji i tregut të ketë përparësi mbi ligjin e dashurisë dhe shëndetit për të gjithë ne,” tha Papa.
Fushatat e vaksinimit në vendet e varfra të Afrikës mbeten shumë pas botës së pasur, veçanërisht Shtetet e Bashkuara dhe Mbretëria e Bashkuar, kështu që Papa Françesku u ka kërkuar udhëheqësve politikë dhe të biznesit të sigurojnë “vaksina për të gjithë, veçanërisht ato më të prekshmet”. /tesheshi.com/
