Papa Françesku ka mbërritur në Maqedoninë e Veriut në vizitën e parë papale në vend.
Ai u mirëprit në Shkup nga presidenti në largim Gjorge Ivanov dhe pritet të mbajë një meshë të madhe në sheshin kryesor të qytetit.
Maqedonia e Veriut ka një popullsi prej 2.1 milion, kryesisht të besimit ortodoks, por vendi ka një bashkësi të madhe shqiptarësh muslimanë, të cilët përbëjnë rreth një të katërtën e popullsisë. Bashkëbesimtarët e Papës në këtë vend përbëjnë më pak se 15 mijë banorë.
Papa pritet të takohet me udhëheqësit fetarë, në një përkujtim të dedikuar Nënës Terezë, e cila ka lindur në Shkup si Anjeze Gonxhe Bojaxhiu, dhe ishte bijë e dy prindërve shqiptarë. Ajo ka lindur në periudhën kur Maqedonia Veriore ishte ende pjesë e Perandorisë Osmane.
Përpara vizitës së tij, Papa Françesku vlerësoi “përzierjen e kulturave, feve dhe etnive në Maqedoninë e Veriut”. Ai tha se po udhëtonte në këtë rajon për të “mbjellë këto fara” të solidaritetit.
Vizita vjen dy ditë pasi Maqedonia Veriore zgjodhi një president të ri, Stevo Pendarovski, dhe për më tepër, pak muaj pasi vendi përfundoi një mosmarrëveshje dhjetëvjeçare me Greqinë fqinje që rezultoi me ndryshimin e emrit. /tesheshi.com/
