Kryekatoliku i botës, Papa Francesku, ka dalë kundër qëndrimit të deritanishëm doktrinor të besimeve monoteike mbi homoseksualitetin, si një “mëkat i madh”, duke ç’mëkatizuar, mbi të gjitha pa asnjë referencë biblike, atë që bënte populli i Lutit, te i cili Zoti zbriti dënim(Sodomë-Gomorra).
Françesku madje kritikoi ligjet që kriminalizojnë homoseksualitetin dhe i quajti “të padrejta”, duke thënë se “Zoti i do të gjithë fëmijët e tij ashtu siç janë”, pa iu referuar ndonjë verseti apo vargu të caktuar biblik, libër ku ai beson. Për më tepër, ai u bëri thirrje peshkopëve katolikë që t’i mirëpresin njerëzit LGBTQ në kishë, ndonëse ata më së shumti janë ateistë, ose nëse jo të tillë, rebelë ndaj Zotit .
“Të jesh homoseksual nuk është krim”, ka thënë nr. 1 i katolicizmit botëror gjatë një interviste për Associated Press, i cili edhe kur ishte kryepeshkop i Buenos Aires-it mbrojti mbrojtjen ligjore për çiftet e të njëjtit seks.
Ai, këtë qëndrim ia atribuoi prejardhjes kulturore dhe tha se peshkopët, në veçanti, duhet t’i nënshtrohen një procesi ndryshimi për të njohur dhe mbështetur dinjitetin e gjithsecilit.
Duke folur për ligjet që kriminalizojnë popullatën LGBTQ, Papa tha se Kisha Katolike mund dhe duhet të punojë për t’i dhënë fund, dhe se homoseksualët duhet të mirëpriten në Kishën Katolike dhe të respektohen dhe nuk duhet të margjinalizohen apo diskriminohen.
“Këta peshkopë duhet të kenë një proces konvertimi”, tha ai, duke shtuar se ata duhet të aplikojnë “butësi, ju lutem, siç ka Zoti për secilin prej nesh”, duke devijuar kështu në sqarimin bazë nëse Zoti e lejon apo e ndalon homoseksualitetin, duke sjellë referencat përkatëse hyjnore për çdo rast.
Ai shtoi se duhet të ketë një ndryshim midis një krimi dhe një mëkati në lidhje me homoseksualitetin.
“Të jesh homoseksual nuk është krim. Së pari duhet të bëjmë një dallim midis mëkatit dhe krimit. Mëkat është edhe mungesa e mëshirës ndaj njëri-tjetrit”, shtoi ai, duke vijua me sofizëm fetar:
“Ne jemi të gjithë fëmijët e Zotit dhe Zoti na do ashtu siç jemi dhe për forcën që secili prej nesh lufton për dinjitetin tonë”.
Kujtojmë se më vitin 2008, Vatikani refuzoi të nënshkruante një deklaratë të OKB-së që bënte thirrje për dekriminalizimin e homoseksualitetit, duke u ankuar se teksti shkoi përtej fushëveprimit të tij origjinal për të përfshirë gjuhën rreth “orientimit seksual” dhe “identitetit gjinor” që e konsideronte problematike. /tesheshi.com/
