Papa Françesku u bëri thirrje autoriteteve në vendet nëpër të cilat kalojnë migrantët t’i kushtojnë vëmendje të veçantë mijëra të miturve të pashoqëruar, duke paralajmëruar situatën dramatike në “rrugën ballkanike”.
Në prag të Ditës Ndërkombëtare të Lutjes kundër Trafikimit të Qenieve Njerëzore, e cila po shënohet sot, Papa vuri në dukje se të miturit e pashoqëruar janë veçanërisht të prekshëm dhe bëri thirrje për mbrojtjen e tyre, raporton Vatican News.
“Fatkeqësisht, në mesin e atyre që janë të detyruar të lënë atdheun e tyre për arsye të ndryshme, ka gjithmonë me dhjetëra fëmijë dhe të rinj që janë vetëm, pa familje dhe të ekspozuar ndaj rreziqeve të shumta. Ne duhet të sigurojmë që fëmijëve dhe adoleshentëve, të cilët janë të brishtë dhe të pafuqishëm, nuk u mungon kujdesi i nevojshëm dhe kanalet e privilegjuara humanitare,” tha Papa.
Shumica e migrantëve të mitur në “rrugën ballkanike” për në vendet e pasura perëndimore vijnë nga Afganistani, Pakistani, Bangladeshi, Siria, Iraku dhe Irani, si dhe migrantë nga Afrika e Veriut për të cilët kjo rrugë është më e sigurt për të udhëtuar sesa Mesdheu. /tesheshi.com/
