“Në ndeshjet me Spanjën dhe Italinë, dua 11 luanë në fushë”. Kështu është shprehur trajneri i kombëtares së Shqipërisë Kristian Panuçi, në prag të ndeshjeve kualifikuese për Botërorin 2018.
Trajneri italian normalisht përdori superlativa, si për spanjollët, ashtu edhe përfaqësuesen e vendit të tij, por theksoi se ndeshjet e mëdha, bëhen pikërisht ndaj skuadrave të mëdha.
“ Futbolli na ka mësuar që mund të bëjmë diçka të mirë e të rëndësishme kur ke skuadra më të forta përballë. Këto janë ndeshje ku interesi e përqendrimi është shumë i madh te lojtarët. Duhet të bëjmë dy sfida plot krenari e dëshirë, pasi i sheh e gjithë bota. Duhet të japim maksimumin, pasi çdo sfidë nis me rezultatin 0-0.
I respektojmë Spanjën dhe Italinë, por do të përpiqemi të marrim ndonjë rezultat të mire”, është shprehur Panuçi. Lidhur me mungesat për shkak dënimi të Mavrajt, Roshit e Kukelit, si edhe rithirrjen në kombëtare të Cikalleshit e Xhakës, trajneri italian theksoi se do të përpiqet të hedhë në fushë, formacionin më të mirë.
“Nuk e kam thënë asnjëherë se Cikalleshi e Xhaka nuk do të kthehen në kombëtare. Xhaka kërkoi falje disa herë dhe i ka kuptuar gabimet e tij. Cikalleshi është një futbollist me peshë në skuadër. Si Cikalleshi, ashtu edhe Xhaka, janë dy lojtarë shumë të mirë që duan të ndihmojnë Kombëtaren, por që tani e tutje ata duhet të respektojnë rregullat. Përsa u përket lojtarëve të skualifikuar, janë mungesa të rëndësishme, por ne do të hedhim në fushë formacionin më të mirë”, tha Panuçi. /tesheshi.com/
