Trajneri i Shqipërisë Kristian Panuci nuk firmos për barazim në ndeshjen me Maqedoninë. Italiani deklaroi në konferencë për shtyp gjatë të hënës, se ka respekt për kundërshtarin, por jo mbivlerësim.
“Erdhëm për të fituar ndeshjen, pastaj të shohim çfarë na sjell fati, me siguri nuk firmosim për një barazim, hyjmë në fushë me kurajë. Me respekt të madhe për Maqedoninë, por të ndërgjegjshëm për cilësitë tona”, deklaroi Panuci.
Trajneri i kuqezinjve konfirmoi se Sadiku do të jetë në dispozicion plotësisht, por iu përmbajt qëndrimit të shprehur më parë, se formacioni do të zbulohet në fushë. Lidhur me vështirësitë e udhëtimit dhe stadiumin e Strumicës, italiani nuk u shpreh i shqetësuar.
“Skuadra do të ketë kohë edhe një ditë për të rikuperuar, por edhe Maqedonia luajti në Izrael dhe jemi në të njëjtat kushte. Jam i bindur se nesër ekipi do të jetë i rikuperuar plotësisht, se janë lojtarë të mësuar të luajnë ndeshje kaq të afërta”.
“Sa i përket stadiumit, është i vogël, por terreni është i mirë. Stadiumet e vogla kanë gjithmonë vështirësi, por ne duhet të mendojmë të luajmë ndeshjen tonë dhe nga kjo pikëpamje të jemi gati”- theksoi Panuci. Lidhur me takticizmin që do të luajë skuadra, drejtuesi i kuqezinjve vuri grintën dhe përqëndrimin, në krye të këshillave.
“Nëse luajmë si 30 minutat e para ndaj Lihtenshtejnit, do të vuajmë shumë, se ishim shumë të ngadaltë. Kemi nevojë të jemi nga minuta e parë deri në të 95- ën, në maksimum, me grintë, dëshirë dhe përqendrim”, theksoi Panuci.
Për italianin, sulmuesi Pandev do të mbahet në vëmendje, por jo se do të ketë mbulim fiks për të. Ndërsa lidhur me stilin e lojës së Maqedonisë dhe fitoreve të saj në dy ndeshjet e fundit, trajneri i kombëtares, u shpreh se kundërshtari do të sulmohet që në fillim. “Do të mundohemi t’i krijojmë ne probleme atyre, duke i sulmuar, do të mundohemi që të prishim rrjedhën e lojës së tyre. Është e vërtetë që luajnë mirë me topin, por karakteristika më e mirë e Maqedonisë, që pashë ndaj Izraelit, është që nuk lejojnë të luajnë të tjerët”, ishte vëzhgimi i Panucit. /tesheshi.com/
